അതിക്രമിച്ചു അവർ

കാലടി മാർക്കറ്റ്, കോഴിക്കോട്ടെ കോക്കനട്ട് മാർക്കറ്റ്, പൊന്നാനിയിലെ മീൻമാർക്കറ്റ്, ആലപ്പുഴയിലെ കല്ലുപാലം... തെരുവുചുമരുകളിൽ നേർക്കാഴ്ചകളുടെ രാഷ്ട്രീയം പറഞ്ഞ് ട്രെസ്സ് പാസ്സേർസ് ചിത്ര സംഘം യാത്ര തുടരുന്നു...

- Shinila

കഥ പറയുന്ന ചിത്രവരകളെ അടഞ്ഞ മുറികളിൽ തളയ്ക്കകരുത്, മാലോകർക്ക് കാണാൻ പാകത്തിൽ ഛായച്ചിറകു നൽകി അവയെ പറക്കാൻ വിടണം. തെരുവിലെ ചുമരുകൾ ചിത്രങ്ങൾക്ക് ചിറകിടുന്ന വിലമതിക്കാനാവാത്ത കാൻവാസുകളാണ്. തിളക്കവും മിനുക്കവുമുള്ള രൂപങ്ങൾക്കപ്പുറം നേർക്കാഴ്ചകളാണ് അവിടങ്ങളിൽ പകർത്തിവെക്കേണ്ടതെന്ന് ഞങ്ങൾ കരുതുന്നു. ആ നേർക്കാഴ്ചകളിൽ സമൂഹത്തിന്റെ കാഴ്ചപ്പാടിലെ നിറമില്ലാത്ത മനുഷ്യരുണ്ട്, തെരുവിന്റെ തേങ്ങലുണ്ട്, ആദിയും അലച്ചിലുമുണ്ട്. പോളിഷ്ഡ് ജീവിതത്തിൽ രേഖപ്പെടുത്താൻ മടിക്കുന്നതെല്ലാമുണ്ട്... ആഘോഷങ്ങൾ ക്കും നാട്ടുകലകൾക്കും തീർച്ചയായും അതിലിടമുണ്ട്.'' - ട്രെസ്സ് പാസ്സേർസ് കലാസംഘത്തിന് തങ്ങളെക്കുറിച്ച് പറയാനുള്ളത് ഇതാണ്. കാലടി ശ്രീശങ്കരാചാര്യ സംസ്കൃത സർവ കലാശാലയിലെ കലാപഠനവിഭാഗത്തിൽ ജന്മമെടുത്ത കൂട്ടായ്മയാണിത്. വേർതിരിവിന്റെ മതിൽക്കെട്ടുകളെ കലയിലൂടെ അലിയിക്കാനെന്നോണം നാടുനീളെ നടന്നവർ വർണക്കഥകളെഴുതുന്നു. കലയും ആദർശവും ഒന്നിച്ചൊരു ചാലായി ഒഴുക്കുന്നു.

തട്ടകത്തിൽ അവർ പകർത്തിയ ചിത്രങ്ങൾ കാണാനും വിശേഷങ്ങളറിയാനും സർവകലാശാലയിലേക്കുചെ ന്നു. ക്യാമ്പസ് കാർണിവലിനു വേണ്ടി ചമയങ്ങളിട്ടു നിൽക്കുകയായിരുന്നു കലാലയം. ട്രെസ്സ് പാസ്സേർസ് നിറം പിടിപ്പിച്ച സർവകലാശാലയെന്നും ഇപ്പോഴതിനെ വിളിക്കാമെന്നു തോന്നി. ലൈബ്രറി ചുമരുകൾ, ക്ലാറിയോടു ചേർന്ന ചുമരുകൾ, കോണിപ്പടി, മ്യൂസിയം... കലാലയം മുഴുക്കെ അവർ നിറഞ്ഞുനിൽക്കുന്നു. പൂർവവിദ്യാർഥികളാണെങ്കിലും ചിത്രപ്പണിയും മ്യുസിയം പണിയുമൊക്കെയായി സംഘം ക്യാമ്പസിലുണ്ട്. അഭിമുഖത്തിനായി കാത്തിരുന്ന ആ "അതിക്രമക്കാരോട് കുശലം ചോദിച്ച് ഒപ്പം കൂടി. അമ്പാടി കണ്ണൻ, അർജുൻ ഗോപി, ജിനിൽ മണികണ്ഠൻ, വിഷ്ണുപ്രിയൻ, ജതിൻ ഷാജി, പ്രണവ് പ്രഭാകരൻ, വിഷ്ണുകുമാർ. കല ചേർത്തുവെച്ചവർ. സർവക ലാശാലയോടു ചേർന്നുള്ള അമ്പാടി കണ്ണന്റെ വീട്ടിലെ ഒത്തുകൂടലുകളിൽ സൗഹൃദവേരുകൾ ആഴ്ത്തിയ അവർ സിരയിലോടുന്ന കലയെ മൂല്യത്തോടെ എവിടെയെങ്കിലും രേഖപ്പെടുത്തണമെന്ന് തീരുമാനിക്കുന്നു. ഭാവികലാ ജീവിതത്തിന് പദ്ധതി തയ്യാറാക്കുന്നു. അങ്ങനെ ട്രെസ്സ് പാസ്സേർസ് പിറക്കുന്നു. കാലടിയും കേരളവും കടന്ന് സംസ്ഥാനത്തിനു പുറത്തേക്കും ശിഖരങ്ങൾ വളർത്തിയ കഥ അവർ പറഞ്ഞു.

ഗാലറിയിൽ ഒതുങ്ങരുത്