ചീറും പുലി

മസായ്മാരയിലെ ചീറ്റപ്പുലിയമ്മയും അവളുടെ കുഞ്ഞുങ്ങളും ഇരതേടി നടപ്പാണ്. ഇരകിട്ടാതെ ഇത് മൂന്നാം ദിനം ഒടുവിലതാ വേട്ടയ്ക്ക് നേരമായി

- G SHAHEED

നമീബിയയിൽ നിന്നെത്തിയ വിരുന്നുകാരുടെ വിശേഷം തീരുന്നില്ല. ഇന്ത്യൻ വനങ്ങളിൽ നിന്ന് ഏഴു പതിറ്റാണ്ടു മുൻപ് അപ്രത്യക്ഷമായ ചീറ്റപ്പുലികളെ തിരിച്ചെത്തിക്കാനുള്ള ശ്രമങ്ങളുടെ ഭാഗമായി, എട്ട് ചീറ്റകളാണ് മധ്യപ്രദേശിലെ കുനോ ദേശീയോദ്യാനത്തിൽ പാർക്കാനെത്തിയിരിക്കുന്നത്. വേഗത്തിന്റെ പര്യായമായ ചീറ്റകൾ ആകാരഭംഗികൊണ്ടും സ്വഭാവസവിശേഷതകൾ കൊണ്ടും പ്രകൃതിസ്നേഹികളുടെയും വന്യ ജീവി ഫോട്ടോഗ്രാഫർമാരുടെയും മനം കവരും. ഇന്ത്യയിലെ കൊട്ടാരക്കെട്ടുകളിലെ ഓമനകളായിരുന്ന ഇവയെ ഇന്നും പല വിദേശരാജ്യങ്ങളിലും ഇണക്കി വളർത്താറുണ്ട്.

"സൗമ്യമായ പെരുമാറ്റം, നമ്മുടെ നേരെ നോക്കിയാൽ സ്നേഹം തുളുമ്പുന്ന ഭാവം''- മൂന്ന് ദശകങ്ങളോളം ചീറ്റപ്പുലിയെക്കുറിച്ച് പഠനം നടത്തിയിട്ടുള്ള ഡോ. ലോറി മാർക്കലിന്റെ നിരീക്ഷണമാണിത്. അമേരിക്കൻ വന്യജീവിശാസ്ത്രജ്ഞയായ ഡോ. ലോറി മാർക്കലാണ് ആഗോള പ്രശസ്തമായ ചീറ്റ കൺസർവേഷൻ ഫണ്ടിന്റെ  അധ്യക്ഷ, ഒരുലക്ഷത്തോളം വരുന്ന ചീറ്റ ചിത്രങ്ങൾ ഈ കൺസർവേഷൻ ഫണ്ടിന്റെ ശേഖരത്തിലുണ്ട്. കെനിയയിലെ മസായിമാര വന്യജീവിസങ്കേതത്തിലെ പ്രധാന ആകർഷണങ്ങളിലൊന്ന് ചീറ്റകൾ തന്നെ. സഫാരി ജീപ്പുകളുടെ മുകളിൽ വിശ്രമിക്കുന്ന ചീറ്റപ്പുലി ചിത്രങ്ങൾ ആസ്വദിക്കാത്തവരുണ്ടോ? ഉള്ളിലേയ്ക്കൊരു സൗമ്യമായ നോട്ടമെറിഞ്ഞ് ഒരൊറ്റക്കുതിപ്പിൽ ജീപ്പിന്റെ മുകളിലേക്ക്... പുൽമേട്ടിലേക്ക് ഇമവെട്ടാതെ നോക്കി, കുറച്ചുനേരം അവിടെ ഇരിപ്പുറപ്പിക്കും. അത്ര നേരവും സഫാരിവണ്ടികൾ കാത്തുനിൽക്കും. നീണ്ട കാലയളവിലൂടെ, വന്യജീവി സങ്കേതത്തിൽ എത്തുന്ന ടൂറിസ്റ്റുകളുമായി ആഴത്തിലുള്ള സൗഹൃദം ചീറ്റപ്പുലികൾക്കുണ്ട്. ആഫ്രിക്കൻ ഭൂഖണ്ഡത്തിലെ 54 രാജ്യങ്ങളിൽ 35 രാജ്യങ്ങളിലും ചീറ്റപ്പുലികളെ കാണാം. ഏറ്റവും കൂടുതൽ ചീറ്റകളുള്ളത് നമീബിയയിലാണ്.