വഞ്ചിനാട്ടിലെ ഓണവില്ല് തേടി

ചിങ്ങത്തിലെ തിരുവോണം അനന്തപുരിയിലെ ശ്രീപത്മനാഭന് പിറന്നാളാണ്. ഭഗവാന് തിരുമുൽക്കാഴ്ചയാകുന്ന ഓണവില്ലിന് പിന്നിൽ നൂറ്റാണ്ടുകളുടെ ചരിത്രവും കലാസപര്യയുമുണ്ട്. മലബാറിലേക്കെത്തുമ്പോഴാകട്ടെ ഓണവില്ലിൽ കാർഷിക സംസ്കൃതിയുടെ താളമുണരുന്നു

- JAYASREE V

സഹപ്രവർത്തകരുടെ കൂട്ടായ്മയായ വാട്സാപ്പ് ഗ്രൂപ്പിൽ നിന്നാണ് ഓണ വില്ലുതേടിയുള്ള യാത്ര ആരംഭിച്ചത്. തിരുവനന്തപുരത്തുകാരിയായ സുഹൃത്ത് ശ്രീപത്മനാഭസ്വാമി ക്ഷേത്രത്തിൽ ഓണവില്ലിന്റെ ബുക്കിങ് ആരംഭിച്ച വിവരവും ആവശ്യക്കാരുണ്ടെങ്കിൽ വാങ്ങിച്ചു തരാമെന്ന വാഗ്ദാനവും പോസ്റ്റു ചെയ്ത ഉടനെ എനിക്കും എന്ന് കൈപൊക്കാൻ ഒട്ടും സംശയിച്ചില്ല.

ചുണ്ടൻ വള്ളവും കഥകളി രൂപവുമല്ലാതെ മലയാളിക്ക് തനതായി എന്ത് കരകൗശലമാണ് എന്ന് സംശയിച്ചിരുന്ന കാലത്താണ് ഓണവില്ലിനെപ്പറ്റി ഒരു ലേഖനം വായിക്കാനിടവന്നത്. ചുമർ ചിത്രങ്ങളുടെ വടിവിൽ, ചുവന്ന പശ്ചാത്തലത്തിൽ ആലേഖനം വില്ലുകൾ ചെയ്യപ്പെടുന്ന ഈ പാരമ്പര്യമായി ഒരു കുടുംബമാണ് നിർമിക്കുന്നത്. മുൻകൂട്ടി ബുക്ക് ചെയ്യുന്നവർക്ക് ക്ഷേത്രത്തിൽനിന്ന് നേരിട്ട് മാത്രമേ ഇവ ലഭിക്കുകയുള്ളു. ഓണ്‍ലൈനായി കിട്ടുമോ എന്നു നോക്കിയെങ്കിലും നിരാശയായിരുന്നു ഫലം. അതുകൊണ്ട്‌ സുഹൃത്തിന്റെ സന്ദേശം കണ്ടപ്പോള്‍ തന്നെ ഓണവില്ല്‌ ബുക്കു ചെയ്തു. ഓണം കഴിയുകയും വില്ലു കിട്ടുകയും ചെയ്തതോടെ എങ്ങനെയാണ്‌ ഇത്‌ കേരളത്തിന്റെ പാതി ദൂരം സഞ്ച രിച്ച്‌ തൃശ്ശൂരില്‍ എത്തിക്കുക എന്ന പ്രശ്നം ബാക്കിയായി. നാലരയടിയോളം നീളവും അരയടി വീതിയുമുണ്ട്‌. തിരുവനന്തപുരത്ത്‌ താമസിക്കുന്ന, ഇടയ്ക്കിടെ നാട്ടില്‍ വന്നു പോകുന്ന അപൂര്‍വം ബന്ധുജനങ്ങളോട്‌ വിവരം പറഞ്ഞു. ആദ്യം സസന്തോഷം ഏറ്റെങ്കിലും പ്രസ്തുത വില്ലിന്റെ ദര്‍ശനം കിട്ടിയതോടെ “സന്നദ്ധ പ്രവര്‍ത്തക"രൊന്നടങ്കം പിന്‍വാങ്ങി. ജനകാത്മജയുടെ പാണീഗ്രഹണത്തിന്‌ വേണ്ടി നിര്‍മിക്കപ്പെട്ട ത്രൈയംബകത്തിന്റെ അവസ്ഥയില്‍ വില്ല്‌ തലസ്ഥാനത്തു തന്നെ തുടര്‍ന്നു. ഇതിനിടെ മാസങ്ങള്‍ കഴിഞ്ഞു. കോവിഡ്‌ ഭീതിയില്‍ സഞ്ചാരം വളരെ കുറഞ്ഞ കാലം. മൂന്നുതവണ മാറ്റിവെക്കേണ്ടിവന്ന യാത്ര മഴക്കാലമടുത്തതോടെ ഇനി നീട്ടാനാവില്ല എന്നുറപ്പിച്ചു. മിഥുനമാസത്തോടെ ഇക്കൊല്ലത്തെ പള്ളിവില്ലുസമര്‍പ്പണത്തിന്റെ പ്രാരംഭ പ്രവര്‍ത്തനങ്ങള്‍ ആരംഭിക്കും. വില്ലിനോടൊപ്പം അതിന്റെ ശില്‍പികളേയും നേരിട്ട്‌ പരിചയപ്പെടാമല്ലോ.

വഞ്ചിഭുമിപതിയുടെ ഓണവില്ലിന്‍ കഥ