കാടും കുളിരും കാട്ടാറും

ശെന്തുരുണി വന്യജീവിസങ്കേതത്തിലെ ഇടിമുഴങ്ങാൻ പാറയിലേയ്ക്കുള്ള യാത്ര അതിമനോഹരവും അതിസാഹസികവുമാണ്. ആ അനുഭവങ്ങൾ പങ്കുവെക്കുന്നു, കേരള വനംവകുപ്പ് ഉദ്യോഗസ്ഥൻ കൂടിയായ ലേഖകൻ

- Ani

പ്രതിരോധിക്കാനാവാത്ത വൈകാരികതയാണ് ഇടിമുഴങ്ങാൻ പാറയിലേയ്ക്കുള്ള യാത്ര. ശെന്തുരുണി വന്യ ജീവിസങ്കേതത്തിലെ കളം കുന്ന് സെക്ഷനിൽപ്പെട്ട വനംവകുപ്പിന്റെ ഈ വിനോദസഞ്ചാരകേന്ദ്രത്തിൽ ഒരു പ്രാവശ്യം പോയിട്ടുള്ളവർ തന്നെയാണ് ഒറ്റയ്ക്കും കൂട്ടായും വീണ്ടും വീണ്ടുമെത്തുന്നത്. വലിച്ചടുപ്പിക്കുന്ന ആ വശ്യതയിൽ കുരുങ്ങിത്തന്നെയാണ് റെയിഞ്ച് ഫോറസ്റ്റ് ഓഫീസറോടും സംഘാംഗങ്ങളോടുമൊപ്പം വീണ്ടും അവിടേക്ക് പുറപ്പെടുന്നത്. യാത്ര തികച്ചും ഔദ്യോഗികമാണെങ്കിലും.

ശെന്തുരുണി വന്യജീവി സങ്കേതത്തിലെ വനാന്തർ ഭാഗങ്ങളിൽ ആറ് ക്യാമ്പ് ഷെഡ്ഡുകളുണ്ട്. എങ്കിലും ഇടിമുഴങ്ങാൻ പാറയിലെ ക്യാമ്പ് ഷെഡ്ഡിലേക്കാണ് എപ്പോഴും സഞ്ചാരികളുടെ തിരക്ക്. ഷെഡ്ഡ് എത്തുന്ന തിനുമുൻപ് വലതുവശത്തായി ഒരു കൂറ്റൻ പാറ കാണാം. തുലാവർഷക്കാലത്ത് മിന്നലിനെ അനുഗമിക്കുന്ന മേഘഗർജനങ്ങൾ പാറയിൽത്തട്ടി പ്രതിധ്വനിക്കുന്നതുകൊണ്ടാവാം ഈ പ്രദേശത്തിന് ഇടിമുഴങ്ങാൻ പാറ എന്ന് പേരു വീഴാൻ കാരണം.

ഇടവപ്പാതിക്ക് സാധാരണ ലഭിക്കാറുള്ള മഴ ഇത്തവണ പെയ്തിട്ടില്ല. അതുകൊണ്ട് റിസർവോയറിൽ ജലനിരപ്പ് നന്നെ കുറവാണ്. കുട്ടവഞ്ചി (coracle boating) സവാരി നടത്തുന്ന കടവിൽത്തന്നെയാണ് ഞങ്ങൾക്കുള്ള ബോട്ടും. കുട്ട വഞ്ചി സവാരിയും ബോട്ടിങ്ങുമാണ് ശെന്തുരുണി വന്യജീവി സങ്കേതത്തിലെ പ്രധാന ആകർഷണങ്ങൾ.

മേൽക്കൂരയുള്ള യാനം കാറ്റുപിടിച്ചുലയുന്ന റിസർവോയറിലെ വലിയ വെള്ളപ്പാത്തികളിലുലഞ്ഞ് അലസഗമനം നടത്തുന്നു. അതിന്റെ സുരക്ഷിതത്വത്തിലിരുന്ന് ഞങ്ങൾ പുറത്തേക്ക് കണ്ണുപായിച്ചു. ഇരുപത് മിനിറ്റിനുമേൽ സഞ്ചരിച്ചു കാണും. “സർ, ഇവിടെ വെള്ളത്തിനടിയിലാണ് കണ്ണാടി ബംഗ്ലാവ്. 2013-ലെ വേനൽക്കാലത്ത് മാത്രമാണ് അത് വെള്ളത്തിനു മീതെ തെളിഞ്ഞത്. അതിന് സുമാർ പന്ത്രണ്ടു മീറ്റർ ഉയരം വരുമെന്നാണ് തോന്നുന്നത്. ഇപ്പോൾ ഇവിടെ ഉദ്ദേശം മുപ്പത് മീറ്ററെങ്കിലും ആഴം കാണും. ബോട്ട് ഡ്രൈവർ ഷിഹാബ് പറഞ്ഞു.