തരംഗമ്പാടിയിലെ ഡാനിഷ് തീരത്ത്

മൺമറഞ്ഞ അധിനിവേശകാലത്തിന്റെ ഓർമ്മകൾ ഇന്നും കോട്ടകെട്ടി നിൽക്കുന്നു, തരംഗമ്പാടിയിൽ. തമിഴ്നാട്ടിലെ ഡാനിഷ് ഗ്രാമം കാണാം

- AJMAL PAZHERI

തമിഴ്നാട്ടിലൊരു കൊച്ചു ഡെൻമാർക്കോ..!?  നാഗപട്ടണത്ത് റെസ്റ്റോറന്റ് നടത്തുന്ന സുഹൃത്ത് മുഹമ്മദ് അസ്ലമാണ് തമിഴ്നാട്ടിലെ ഡെൻമാർക്കിനെക്കുറിച്ച് പറഞ്ഞത്. സംഭവം ശരിയാണ്, ഡെൻമാർക്കിന് ഇങ്ങ് തമിഴ്നാട്ടിലുമുണ്ട് പിടി തമിഴ്നാടിന്റെ കിഴക്കൻ ജില്ലയായ മയിലാടു തുറൈയിലെ തരംഗമ്പാടി എന്ന പ്രദേശം ഒരുകാലത്ത് അടക്കിവാണത് ഡെൻമാർക്കുകാരായിരുന്നു. തരംഗമ്പാടിയിൽ അവർ കൊച്ചു ഡാനിഷ് സാമ്രാജ്യം സ്ഥാപിച്ചു. ആ ഓർമ്മകൾ ഇന്നും അവിടെ ബാക്കിയുണ്ട്. എറണാകുളം-കാരയ്ക്കൽ എക്സ് പ്രസ്. വേളാങ്കണ്ണിയിലേക്കും നാഗൂരിലേക്കും കേരളത്തിലെ തീർഥാടകർ ആശ്രയിക്കുന്ന തീവണ്ടി. ഈ രണ്ട് തീർഥാടനകേന്ദ്രത്തിലേക്കുമുള്ള ആളുകൾ ഇറങ്ങിയതോടെ നാഗപട്ടണം മുതൽ ട്രെയിൻ കാലി. അതിനു ശേഷമുള്ള രണ്ടാമത്തെ സ്റ്റേഷനാണ് പോണ്ടിച്ചേരിയിൽ സ്ഥിതിചെയ്യുന്ന കാരയ്ക്കൽ. അവിടെനിന്ന് തരംഗ പാടിയിലേക്ക് ബസ്സോ ഓട്ടോയോ കിട്ടും. കാരയ്ക്കലിൽ രണ്ടു തരം കാലാവസ്ഥയാണ്. ഉഷ്ണകാലം, മറ്റൊന്ന് അമിതോഷ്ണകാലം. ട്രെയിൻ ഇറങ്ങിയതു മുതൽ ചൂടിന്റെ ശക്തിയറിഞ്ഞുതുടങ്ങി. അവസാന സ്റ്റേഷനായിട്ടു പോലും കാരയ്ക്കലിൽ പുറത്തിറങ്ങിയത് വിരലിലെണ്ണാവുന്ന യാത്രക്കാർ മാത്രം. അവരെ കാത്ത് രണ്ടോ മൂന്നോ ഓട്ടോറിക്ഷകളും. ഞങ്ങൾ സ്റ്റാൻഡിലെത്തുമ്പോഴേക്കും ഓട്ടോകളെല്ലാം പോയിക്കഴിഞ്ഞിരുന്നു.

“ഇവിടെ നിന്ന് ഇനി ഓട്ടോ കിട്ടില്ല. അടുത്ത ട്രെയിൻ വരണം, കുറച്ചൂടെ മുന്നോട്ടുപോയാൽ കിട്ടിയേക്കും''-ഓട്ടോസ്റ്റാൻഡിന് അരികിൽ ഇരുന്ന ഒരാൾ ഞങ്ങളോട് പറഞ്ഞു. വലിയ ബാഗുകളും പേറി സ്റ്റേഷന്റെ പുറത്തെത്തി. വെയിലിന്റെ തീവ്രത കൂടിവന്നു. അര കിലോമീറ്ററോളം നടന്ന് റോഡെത്തി. അവിടെ നിന്നൊരു ഓട്ടോ പിടിച്ച് നേരെ ഹോട്ടലിലേക്ക്. ഏകദേശം മൂന്നുകിലോമീറ്ററുണ്ടായിരു ന്നു ഹോട്ടലിലേക്ക്. ചെറിയ കോവിലുകൾ, ഉച്ചയ്ക്കും സജീവമായ ചായക്കടകൾ, പച്ചക്കറികളും പഴങ്ങളും വിൽക്കുന്ന സ്ത്രീകൾ, ഇടയ്ക്കിടെ വരുന്ന ചെറു പാലങ്ങൾ... കാരയ്ക്കലിലെ പുറംകാഴ്ചകൾ ഇങ്ങനെയാ യിരുന്നു. ഹോട്ടലിൽ ഞങ്ങളെ വരവേറ്റത് വായാടിയായ റിസപ്ഷനിസ്റ്റായിരുന്നു. ഒരു സെക്കൻഡ് പോലും ഇടവേളയില്ലാതെ. കാരയ്കലിനെക്കുറിച്ചും തരംഗപാടിയെക്കുറിച്ചും അദ്ദേഹം വാചാലനായി. തരംഗമ്പാടിയിലേക്ക് പോകാൻ ഓട്ടോ റിക്ഷയും പുള്ളിക്കാരൻ റെഡിയാക്കിത്തന്നു.