అందరూ ముక్తులవ్వాలి

‘దుర్జనులు సజ్జనులు కావాలి, సజ్జనులు శాంతిని పొందాలి, శాంతిని పొందినవారు బంధవిముక్తులైన బంధవిముక్తులవ్వాలి, వారు ఇతరుల ముక్తికై పాటుపడాలి' అని ప్రార్థించడం నేర్పాయి మన వేదాలు.

- 

'బహుజన హితాయ బహుజన సుఖాయ, లోకానుకంపాయ భిక్షువులారా, మీ మోక్షానికై పాటుపడటమేగాక బహుజన హితానికై పాటుపడండి' అన్నాడు బుద్ధుడు.

శ్రీరామకృష్ణులు తమ సాధనాకాలం తరువాత దక్షిణేశ్వరం కుటీరం పైకెక్కి 'నేను మీకోసం ఎదురుచూస్తున్నాను.భక్తులారా, ఎక్కడ ఉన్నా రండి' అని పిలిచేవారు. ఆధ్యాత్మిక మార్గంలో ముందుకు సాగేందుకు అందర్నీ ప్రోత్సహించేవారు.నిర్వికల్ప సమాధిలో నిమగ్నమై ఆనందంగా రోజులు గడపాలనుకున్న నరేన్ ను శ్రీరామకృష్ణులు 'నువ్వొక ఆధ్యాత్మిక వటవృక్షమై ఎందరికో నీడనిస్తావని ఆశిస్తున్నాను, అటువంటిది నిర్వికల్ప సమాధిని ఆస్వాదిస్తూ కూర్చోవడం నీ స్వార్థమవుతుంది' అంటూ కోప్పడ్డారు.

ఈ మాటలు నరేన్ కళ్ళు తెరిపించాయి. తరువాతి కాలంలో స్వామి వివేకానంద అన్నారు, 'నా ఆశయాన్ని క్లుప్తంగా కొన్ని మాటల్లో చెప్పవచ్చు. అదే - మానవకోటికి వారిలోని దివ్యత్వాన్ని గురించి బోధించి వారి జీవితంలో ప్రతి కార్యకలాపంలోనూ ఆ శక్తిని ఎలా అభివ్యక్తం చేయాలో బోధించడమే'. ఇదేవిధమైన సార్వత్రిక ప్రార్థనను శ్రీమద్భాగవతం సప్తమ స్కంధంలో 9,10 అధ్యాయాల్లో ప్రహ్లాదుడి నోట వింటాం.