ആരാണ് മുഖ്യശത്രു?

1952 ലെ പൊതുതെരഞ്ഞെടുപ്പിൽ കമ്മ്യൂണിസ്റ്റ് പാർട്ടി ശക്തിപ്പെടുമെന്നും, ആന്ധ്രാപ്രദേശിൽ നിയമസഭാതെരഞ്ഞെടുപ്പിൽ കമ്മ്യൂണിസ്റ്റ് പാർട്ടി അധികാരത്തിൽ വരുമെന്നും നിരീക്ഷണങ്ങളുണ്ടായിരുന്നു. കേരളത്തിലെ എ.കെ.ജിയെ പാവങ്ങളുടെ പടത്തലവൻ എന്ന് വിശേഷിപ്പിച്ചപോലെ ആന്ധ്രയിലെ പാവപ്പെട്ട കർഷകരും കർഷകത്തൊഴിലാളികളും സ്വന്തം വീടുകളിൽ പടംവച്ചു പി.സുന്ദരയ്യയെ പൂജിച്ചിരുന്നു.

- അഡ്വ . എം. മനോഹരൻ പിള്ള

ആരാണ് സ്വന്തം ശത്രു എന്നുകണ്ടുപിടിക്കാനുള്ള ഇൻഡ്യയിലെ രാഷ്ട്രീയപ്പാർട്ടികളുടെ യാത്രയ്ക്ക് നൂറ്റാണ്ടുകളുടെ പഴക്കമുണ്ട്. 1947 ൽ ഭാരതം സ്വതന്ത്രാകുന്നതിന് മുമ്പ് പൊതുമുഖ്യശത്രു ബ്രിട്ടീഷുകാരായിരുന്നു. അക്കാലത്ത് ബ്രിട്ടീഷുകാരുടെ സാമ്രാജ്യത്വത്തെപ്പറ്റിയും കോളനിവാഴ്ചകളെക്കുറിച്ചും കോൺഗ്രസുകാരും കമ്മ്യൂണിസ്റ്റുകാരും തമ്മിൽ വിശകലന വിവാദങ്ങളുണ്ടായിട്ടുണ്ട്.

ശക്തികൂടിയവനെതിരെ ശക്തിയില്ലാത്തവർ ഒന്നിച്ചുകൂടാൻ കണ്ടെത്തുന്ന മാനദണ്ഡത്തിന്റെ അടിസ്ഥാനത്തിൽ ശക്തി കൂടിയവനിടുന്ന പേരാണ് മുഖ്യ ശത്രു. കേരളത്തിൽ മുഖ്യശത്രുവിനെ തോൽപ്പിക്കാൻ കണ്ടുപിടിച്ച തന്ത്രത്തിന്റെ പേരാണ് ഐക്യമുന്നണി.

1952 ലെ പൊതുതെരഞ്ഞെടുപ്പിൽ കമ്മ്യൂണിസ്റ്റ് പാർട്ടി ശക്തിപ്പെടുമെന്നും, ആന്ധ്രാപ്രദേശിൽ നിയമസഭാ തെരഞ്ഞെടുപ്പിൽ കമ്മ്യൂണിസ്റ്റ് പാർട്ടി അധികാരത്തിൽ വരുമെന്നും നീരീക്ഷണങ്ങളുണ്ടായിരുന്നു. കേരളത്തിലെ എ.കെ.ജിയെ പാവങ്ങളുടെ പടത്തലവൻ എന്ന് വിശേഷിപ്പിച്ചപോലെ ആന്ധ്രയിലെ പാവപ്പെട്ട കർഷകരും കർഷകത്തൊഴിലാളികളും സ്വന്തം വീടുകളിൽ പടം വച്ചു പി.സുന്ദരയ്യയെ പൂജിച്ചിരുന്നു. ഇന്ന് ആന്ധ്രയിലും ബീഹാറിലും രണ്ട് കമ്മ്യൂണിസ്റ്റ് പാർട്ടികളുടെ ഇന്റക്സ് സി.പി.ഐ(എം.എൽ)നെ ക്കാൾ താഴെയാണെന്നുള്ളത് ചരിത്രം വരുത്തിയ കാലചക്രത്തിന്റെ ഒരു ഭ്രമണകഥ.

1957 ൽ കമ്മ്യൂണിസ്റ്റ് പാർട്ടിക്ക് ഒറ്റയ്ക്ക് ഭൂരിപക്ഷം കിട്ടി അധികാരത്തിലെത്തുമ്പോൾ കേരളത്തിൽ രണ്ടു പ്രശ്നങ്ങളുണ്ടായി. ഒന്ന് കമ്മ്യൂണിസ്റ്റുകാരും, മറ്റൊന്ന് കമ്മ്യൂണിസ്റ്റ് വിരോധികളായ കമ്മ്യൂണിസ്റ്റ് വിരുദ്ധരും. കമ്മ്യൂണിസ്റ്റ് സർക്കാരിനെ താഴെയിറക്കാൻ കമ്മ്യൂണിസ്റ്റ് വിരുദ്ധരും വിരോധികളും ആസൂത്രണം ചെയ്ത വിമോചന സമരത്തിൽ ജാതി സമുദായ ശക്തികളും ക്രിസ്ത്യൻ, മുസ്ലീം മതമേലധ്യക്ഷന്മാരും ചേർന്നതോടെ ക്രമസമാധാനം തകർന്നതിന്റെ പേരിൽ കമ്മ്യൂണിസ്റ്റ് സർക്കാരിനെ ദൽഹിയിലെ ജവഹർലാൽ നെഹ്റു സർക്കാർ പിരിച്ചുവിട്ടു.

പി.എസ്.പിയും കോൺഗ്രസും മുസ്ലീം ലീഗും ചേർന്ന കമ്മ്യൂണിസ്റ്റ് വിരുദ്ധ മുന്നണി 1960 ലെ നിയമസഭാ തെരഞ്ഞെടുപ്പിൽ പട്ടം താണുപിള്ളയുടെ നേതൃത്വത്തിൽ സർക്കാർ രൂപീകരിച്ചു. കോൺഗ്രസുകാർ മുഖ്യശത്രുവായ കമ്മ്യൂണിസ്റ്റുകാരെ തോൽപ്പിച്ച് അധികാരം പിടിച്ചുപറ്റി.