റോബർട്ട് മാപ്പിൾ തോർപ്പ്

ഫോട്ടോഗ്രാഫിയിൽ ചരിത്രമെഴുതിയ അമേരിക്കൻ യുവഫോട്ടോഗ്രാഫർ

- 

അമേരിക്കൻ യുവഫോട്ടോഗ്രാഫർ, ബ്ലാക്ക് ആന്റ് വൈറ്റ് ഫോട്ടോഗ്രാഫിയുടെ ഉപാസകനായിരുന്ന റോബർട്ട് മാപ്പിൾ  തോർപ്പിന്റെ ജീവിതം ഹൃസ്വമായിരുന്നു.

ബ്ലാക്ക് ആന്റ് വൈറ്റ് ഫോട്ടോഗ്രാഫിയുടെ കാല്പനിക സൗന്ദര്യം ആസ്വദിക്കണമെങ്കിൽ അത് റോബർട്ട് മാപ്പിൾ തോർപിന്റെ ഫോട്ടോഗ്രാഫി തന്നെ കാഴ്ചക്ക് വിധേയമാക്കണം. പോർട്രയിറ്റ് ഫോട്ടോഗ്രാഫി സെൽഫ് പോർട്രയിറ്റ് ഇവയെല്ലാം ഒന്നിനൊന്ന് മാറ്റുരക്കുന്നവയാണ്. ചുരുങ്ങിയകാലം കൊണ്ട് ചിത്രകലയിലും ഫോട്ടോഗ്രാഫിയിലും തന്റേതായ മുഖമുദ്ര പതിപ്പിക്കാൻ റോബർട്ട് മാപ്പിൾ തോർപിന് കഴിഞ്ഞു. 1946-നവംബർ 4 ന് ന്യൂയോർക്കിലെ ഫ്ളോറൽ പാർക്കിനു സമീപം റോബർട്ട് മാപ്പിൾ തോർപ്പ് ജനിച്ചു. ഇലക്ട്രിക്കൽ എൻജിനീയറായ ഹാരി ഇർ വിംഗ് മാപ്പിൾ തോപ്പ് പിതാവ്, അമ്മ ജോവൻ ഡൊറോത്തി. തികച്ചും ഒരു കത്തോലിക്ക മതവിശ്വാസത്തിന്റെ അടിസ്ഥാനത്തിൽ ജിവിച്ചവരായിരുന്നു കുടുംബം. മൂന്ന് സഹോദരൻമാർ, രണ്ട് സഹോദരിമാർ. ഒരു സഹോദരൻ ഫോട്ടോഗ്രാഫർ ആയിരുന്നു.

വളരെ ചെറുപ്രായത്തിൽ തന്നെ കലാപരമായ കഴിവുകൾ പ്രകടിപ്പിച്ച മാപ്പിൾ തോർപ്പ്, മാർട്ടിൻ വാൻബൻ ഹൈസ്കൂളിൽ നിന്ന് 1963 - ൽ വിദ്യാഭ്യാസം പൂർത്തിയാക്കി. റോബർട്ട് മാപ്പിൾ തോർപ്പിന്റെ കലാപരമായ ജീവിതത്തിൽ ചിത്രകാരനായ ജോസഫ് കോർനെൽ, ദാദാ സ മ്പ്രദായ ചിത്രകാരൻ മാർഷൽ ഡ്യൂകാമ്പ്, എന്നിവർ ഏറെ സ്വാധീനിച്ചിരുന്നു. ഹൈസ്കൂൾ വിദ്യാഭ്യാസത്തിനുശേഷം ബ്രൂകനിലെ പാട്ട് ഇൻസ്റ്റിറ്റ്യൂട്ട് ഓഫ് ഫൈൻ ആർട്സിൽ ചേർന്നു. അവിടെ നിന്ന് 1969 -ൽ ചിത്രകലാപഠനം പൂർത്തിയാക്കാതെ ഇറങ്ങി.