"Periyar Vision OTT "ஒரு சமூக புரட்சி ஊடகத்தளம்"

பெரியார் விஷன் ஓ.டி.டி. தளத்தில் தந்தை பெரியார் அவர்களின் சிந்தனைகளை முன்னெடுத்துச் செல்லும் விதத்தில் குறும்படங்கள், பிரபலங்களின் பேட்டிகள், பேச்சுக்கள், திரைப்படங்கள் என்று பல்வேறு நிகழ்ச்சிகள் உள்ளன.

- 

அதில் நான் பார்த்ததில், தந்தை பெரியார் பற்றி பிரபலங்களின் பார்வை என்ற பகுதியில் பிரபலங்களின் பேச்சு மிகவும் இரசிக்கதக்க விதத்தில் இருந்தது. பெரியார் அவர்களையும், அவர் சிந்தனைகளையும் எந்தளவிற்கு அவர்கள் உள்வாங்கி உள்ளார்கள் என்பதைப் பார்க்கும் நமக்கு மிகவும் நெகிழ்ச்சியாக இருந்தது. அப்படி தந்தை பெரியார் அவர்களைப் பற்றிப் பேசிய பிரபலங்களின் பேச்சுக்கள் சில.

திரைப்பட நடிகர் டி.ஆர். சிலம்பரசன் அவர்கள் "தந்தை பெரியாரைப் பற்றி ஒரு வரியில் சொல்வதாக இருந்தால், 'கடவுளை மற மனிதனை நினை' அவ்வளவுதான். சக மனிதர்கள், தங்களைச் சுற்றியுள்ள மனிதர்களைப் பற்றியே நினைக்காத போது கடவுளை நினைத்து என்னதான் பயன்? எனக்குப் பல்வேறு பிரச்சினைகள் வரும் போது எனக்குத் தன்னம்பிக்கை கொடுக்கக் கூடியவர்கள் இரண்டு பேர். ஒருவர் என் தந்தை மற்றொருவர் தந்தை பெரியார். பெரியார் பற்றிப் பாடல் ஒன்றை வெளியிட்டோம்.

அதற்கு 'பெரியார் பாட்டு' என்று பெயர் வைக்கவில்லை. 'பெரியார் குத்து' என்றுதான் வைத்தோம். அதற்குக் காரணம் அவருடைய பேச்சு ஒவ்வொன்றும் அடி, இடி, குத்து மாதிரி இருக்கும். அதற்குத்தான் பெரியார் குத்து என்று பெயர் வைத்தோம். ஒரு ஆணாக இருந்து பெண் விடுதலைக்காகப் பாடுபட்ட ஒரே தலைவர் தந்தை பெரியார் அவர்கள் மட்டுமே. இன்றைய காலகட்டத்தில் பெரியாரை உயர்த்திப் பிடிப்பது காலத்தின் தேவை. இதைச் செய்வது என் கடமை” என்று பேசியிருந்தார்.