மாநில முதலமைச்சர்களை ஒருங்கிணைக்கும் நமது முதலமைச்சரின் அணுகுமுறை ஞாலம் பாராட்டி வாழ்த்தவேண்டிய நிலைப்பாடு!

முதலமைச்சரைப் பாராட்டி தமிழர் தலைவர் ஆசிரியர் அறிக்கை

- 

மக்களால் தேர்ந்தெடுக்கப்பட்ட ஓர் அரசு நிறைவேற்றும் மசோதாக்களை கால வரையறையின்றி முடக்கும் மாநில ஆளுநர்களின் போக்கிற்குச் சட்டப் போராட்டம் நடத்தி, வெற்றி கண்டவர் நமது முதலமைச்சர்! இது முதற்கட்ட வெற்றி! இரண்டாவதாக இந்த மாநில உரிமை வெற்றியை முறியடிக்க குடியரசுத் தலைவரை அரசியல் ஆயுதமாகப் பயன்படுத்தும் போக்கையும் முறியடிக்க எதிர்க்கட்சிகள் ஆளும் மாநில முதலமைச்சர்களோடு தொடர்பு கொண்டு ஒருங்கிணைக்க மேற்கொள்ளும் தமிழ்நாடு முதலமைச்சரின் அணுகுமுறை ஞாலமே பாராட்டி வாழ்த்திட வேண்டிய சரியான நிலைப்பாடு என்று திராவிடர் கழகத் தலைவர் ஆசிரியர் கி.வீரமணி விடுத்துள்ள அறிக்கை வருமாறு:

17.5.2025 அன்று சென்னையில் மிகச் சிறப்போடு நடைபெற்ற பள்ளிக் கல்வித் துறை அமைச்சர் அன்பில் மகேஸ் பொய்யாமொழி அவர்களால் எழுதப்பட்டுள்ள "தேசியக் கல்விக் கொள்கை - 2020 எனும் மத யானை” என்ற நூல் வெளியீட்டு விழாவில், அந்நூலை வெளியிட்டு ஆற்றிய பேருரையில் நமது 'திராவிட மாடல்' ஆட்சியின் முதலமைச்சர் முத்துவேல் கருணாநிதி ஸ்டாலின் அவர்கள் இரண்டு முக்கியக் கருத்துரைகளை வெளியிட்டு, தமிழ்நாட்டின் 'திராவிட மாடல்' ஆட்சி, தமிழ்நாட்டிற்கு மட்டுமல்ல, ஒட்டுமொத்த இந்திய ஜனநாயகத்தினையும், அரசமைப்புச் சட்டத்தின் மாண்பையும், மதிப்பையும் காப்பாற்றிட முனைப்புடன் உரிமைக் குரல் எழுப்பும் ஓர் அரசு என்பதைத் தெளிவுபடுத்தியுள்ளார்.

பாராட்டி வரவேற்கத்தக்க முக்கிய அறிவிப்புகள் அவை இரண்டும்!

நிதியைவிட கொள்கையும், உரிமையும்தான் முக்கியம் என்று கூறும் நமது முதலமைச்சர்!