హిమాలయాల రాణి.. సిమ్లా

భారతదేశంలోని రాష్ట్రాల్లో ఒకటి హిమాచల్ ప్రదేశ్. మంచుతో కప్పబడిన పర్వతాలు అధికంగా ఇక్కడ కనిపిస్తాయి. ఏడాదిపాటూ ఇక్కడ మంచు పర్వతాలు దర్శనమివ్వడం వలన దీనికి హిమాచల్ ప్రదేశ్ అనే నామం సార్థకమైంది.

- - షేక్ అబ్దుల్ హకీం జాని

భారతదేశంలోని రాష్ట్రాల్లో ఒకటి హిమాచల్ ప్రదేశ్. మంచుతో కప్పబడిన పర్వతాలు అధికంగా ఇక్కడ కనిపిస్తాయి. ఏడాదిపాటూ ఇక్కడ మంచు పర్వతాలు దర్శనమివ్వడం వలన దీనికి హిమాచల్ ప్రదేశ్ అనే నామం సార్థకమైంది.

ఒకప్పుడు ఇది కేంద్రపాలిత ప్రాంతంగా వుండేది. అయితే 25 జనవరి 1971లో భారతదేశపు 18వ రాష్ట్రంగా ఏర్పాటైంది. దీని రాజధాని నగరం సిమ్లా. ఇది ఉత్తర భారత రాష్ట్రమైన హిమాచల్ ప్రదేశ్కు రాజధాని మాత్రమే కాదు దేశంలోని అత్యంత ప్రసిద్ధ హిల్ స్టేషన్లలో ఒకటి. సిమ్లా పేరు వినగానే మంచుతో కప్పబడిన పర్వతాల సుందర దృశ్యాలు గుర్తుకు వస్తాయి. సుందరమైన ప్రకృతి దృశ్యాలు, వలసరాజ్య కాలం నాటి ఆకర్షణలు, ఆహ్లాదకరమైన వాతావరణంతో సిమ్లా పర్యాటకులను విశేషంగా ఆకర్షిస్తుంది. ఇది సముద్ర మట్టానికి సుమారు 2,200 మీటర్ల ఎత్తులో ఉంది. సిమ్లాను హిమాలయాల 'రాణి'అని కూడా పిలుస్తారు.

బ్రిటిష్ ఇండియా వేసవి రాజధానిగా సిమ్లా ఖ్యాతినార్జించింది.సిమ్లా ఏడాది మొత్తం విలాస కేంద్రంగా విరాజిల్లుతుంది. ఈ నగరాన్ని ఏడు కొండ శిఖరాల మధ్య కొండ చరియ అద్భుతంగా నిర్మించారు. అప్పట్లో ఇక్కడ రాజభవనాల నిర్మాణాలు జరిగాయి. ఇక్కడ 1857లో బ్రహ్మాండమైన చర్చి నిర్మించారు.

ఒకప్పటి వైశ్రాయి భవనం 1888లో నిర్మించారు. మరో అద్భుత నిర్మాణం గోర్టన్ కోట ప్రాచీన చరిత్రకు అద్దం పడుతుంది. పర్వతాలపై వున్న మంచు కరిగి ఏర్పడిన అద్భుత జలపాతాలు బహుసుందరంగా కనిపిస్తాయి.పంజాబులో ప్రవహించే ఐదు నదుల్లో జీలమ్ నది తప్ప మిగిలిన నాలుగు నదులు ఇక్కడ పుట్టినవే.మానససరోవరంలో పుట్టి ప్రవహించే సట్లేజ్ నది హిమాచల్ ప్రదేశ్లో ప్రవహించే నదులన్నింటిలోను అతి పెద్దది.. సట్లేజ్, చీనాబ్, రావి, యమున, బీయాస్ ఇత్యాది జీవనదులు హిమాచల్ ప్రదేశ్లో ప్రవహిస్తున్నాయి.