ప్రకృతి ఒడిలో పశుపతినాథుడు

స్వర్గానికి స్థలం చాలన్నట్టు, భూలోకానికి దిగి వచ్చినట్టు, కనులకు విందు చేస్తున్నట్టు, హిమాలయ పర్వతసానువులు రక్షణలో ఒదిగినట్టున్న భూతల స్వర్గం నేపాల్.

- - సిహెచ్.పద్మ

స్వర్గానికి స్థలం చాలన్నట్టు, భూలోకానికి దిగి వచ్చినట్టు, కనులకు విందు చేస్తున్నట్టు, హిమాలయ పర్వతసానువులు రక్షణలో ఒదిగినట్టున్న భూతల స్వర్గం నేపాల్.

హిమాలయాల్లోని శివాలిక్ రీజియన్ (అవుటర్ హిమాలయాలు)లో ఉన్న నేపాల్లో అధిక జనాభా హిందువులే. అతి ముఖ్యమైన మైనారిటీలు టిబెటన్స్, ముస్లింలు, క్రిస్టియన్లు.ఒకప్పుడు నేపాల్ అశోక సామ్రాజ్యంలో ఒక భాగంగా వుండేది. కొన్ని శతాబ్దాలకు ముందు ఇది ఒక లోతైన చెరువు ప్రాంతం. రహస్య తంత్రవిద్యల వల్ల, అత్యంత పెద్దదైన బహిరంగ మరుభూమి వల్ల అందరికీ తెలిసిన ఈ ప్రదేశం పశుపతినాథుడైన ఆ మహాశివుని అరుదైన ఆలయ ఆధ్యాత్మిక సంపద వల్ల మరింతగా జగత్ప్రసిద్ధమైంది.

అడుగు తీసి అడుగేస్తే అతి తక్కువ మందికి మాత్రమే తెలిసిన అనేక అంతుచిక్కని రహస్యాలు. ఎన్నో ప్రకృతి విపత్తులు, అనేక ఘోర పరిస్థితులు.. అయినా చెక్కుచెదరని గాంభీర్యం పశుపతినాథ ఆలయం.

నేపాల్ మాహాత్మ్యంలో రాయబడిన కథనం ప్రకారం పశుపతినాథ శివలింగం స్వయంభువుగా వెలిసింది. శివుడు తన కైలాసాన్ని వీడి భాగమతి నదీ తీరాన ఇప్పుడు ఆలయం వున్న ప్రదేశానికి వచ్చాడు. ఇక్కడి పార్వతీ స్వరూపమైన ప్రకృతి సౌందర్యానికి పరవశుడై కొంతసేపు ఇక్కడే ఆగిపోయాడు. శివుడు కైలాసానికి ఎంతసేపటికీ తిరిగి రాకపోయేసరికి దేవతలు ఆందోళనతో విష్ణువుతో మొరపెట్టుకొంటారు. విష్ణువు శివుని ఉనికిని గ్రహిస్తాడు.

శివుడిని తనతో తీసుకొనిపోవటానికి తానే స్వయంగా భూమిపై కాలు మోపుతాడు. శివుడు అందమైన, మూడు కొమ్ములున్న జింకరూపాన్ని ధరించి అటూ ఇటూ పరుగులు తీశాడు. విష్ణువు జింక కొమ్మును పట్టుకొని ఆపే ప్రయత్నం చేయగా- కొమ్ము విరిగి అక్కడే భూమిపై పడింది. శివుడు నిజరూపం ధరించి కైలాసానికి వెళ్తాడు. జింక కొమ్ము విరిగిపడిన ఆ స్థలంలో ఒక శివలింగం స్వయంభువుగా వెలిసింది. ఆ విధంగా శివుడే స్వయంగా వెలిసిన ఆ ప్రాంతంలో చాలాకాలం తర్వాత పశుప్రేక్షుడు అనే రాజు ఒక ఆలయాన్ని నిర్మించాడు. అదే ఇప్పుడు మనకు దర్శనమయ్యే పశుపతినాథ మందిరం.