నాన్నలా మారిపోయా..

సింగిల్ పేజీ కథ

- సింగంపల్లి శేష సాయి కుమార్

“అవును.. నేను మారిపోయాను. ఆ విషయం నాకు స్పష్టంగా అర్థమవుతోందని అనుకుంటుండగా దూరం నుంచి "హలో సార్! ఈ మందులు త్వరగా తీసుకురండి. బిడ్డను రెండు రోజుల పాటు లైట్ కింద పెట్టాలి, అప్పుడే కామెర్లు రాకుండా ఉంటాయి" అంది నర్సు. వెంటనే వెళ్లి కావలసిన మందులన్నీ తీసుకొచ్చి డోర్ బయటి నుంచి అందించాను. ఐ.సీ.యు. అద్దాల తలుపుతో ఉంది. అందులో నుండి కళ్ళు పెట్టి చూస్తే ఎదురుగా ఒక తెల్లటి బల్ల, దానిపై ఒక పలుచటి గుడ్డ, దానిపై కాళ్లు చేతులు గట్టిగా ఆడిస్తున్న బిడ్డ. బిడ్డ ఏ రంగో కనపడడం లేదుగానీ, పైనుండి మాత్రం ఒక నీలపు రంగు కాంతి పడుతోంది. ఆ కాంతి బిడ్డ కళ్లల్లోకి పడకుండా కళ్ళకి ఒక గుడ్డ కట్టేసారు. ఒక్క క్షణం బిడ్డను చూసి మనసు ఉప్పొంగిపోయింది.

ఊళ్లో మా నాన్నకంటూ కొన్ని విలువలున్నాయి. ఎవరి దగ్గరా చేయి చాపడు. తనకున్న దాంట్లో బిడ్డలను పెంచి సంసారం చేయాలన్నది ఆయన తత్వం. మమ్మల్ని చదివించిందంతా గవర్నమెంటు బడుల్లోనే. నేను పది పాస్ అయ్యాను. ఇంటర్లో ఎక్కడ చేర్చాలని ఆలోచిస్తోంది అమ్మ.

“వాణ్ణి ఎక్కడ చేర్చినా చదవాల్సింది.వాడే కదా, ఎక్కడ చెప్పినా చదువు ఒకటే, చదుకోవాలని వాడికుంటే వాడే చదువుకుంటాడు" అన్నాడు నాన్న.