சர்வதேசத்திடம் நீதி கோரும் பாதிக்கப்பட்ட வடகிழக்கு உறவுகள்

வடகிழக்கு தமிழர் தாயகங்களில் முன்வைக்கப்படும் கோரிக்கைகளுக்கு அரசியல் தீர்வின்றிய நிரந்தரமான நிலையில் பின்வாங்கும் நிலை தொடர்கின்றது. குறிப்பாக தமிழ் பேசும் மக்கள் பல்வேறு கோரிக்கைகள் அடங்கிய மஹஜரையும் முன்னிருத்தியும் வலியுறுத்தியும் வருகின்ற நிலைதில் நீதி இல்லாமல் தொடர் போராட்டங்களை முன்னெடுத்து வருகின்றனர்.

- ஹஸ்பர் ஏ ஹலீம்

இதன் ஒரு அங்கமாக வடகிழக்கு வலிந்து காணாமல் ஆக்கப்பட்ட சங்கம் பல்வேறு கோரிக்கைகளை முன்வைத்து சுழற்சி முறையிலான உண்ணா விரதப் போராட்டத்தை ஆரம்பித்தார்கள்.

வடக்கு கிழக்கு வலிந்து காணாமல் ஆக்கப்பட்ட உறவுகளின் சங்கம் வலியுறுத்தியபடி: இலங்கையின் உள்நாட்டு பொறிமுறையை நிராகரிக்கிறோம், தமிழின அழிப்பு, வலிந்து காணாமல் ஆக்கப்படுதல், போர் குற்றங்கள் மற்றும் மனித புதைகுழி தொடர்பில் சர்வதேச சுயாதீன விசாரணையை மட்டுமே கோருகிறோம்.

இந்த கோரிக்கையை வலுப்படுத்தும் வகையில், யாழ்ப்பாணம் செம்மணி மனித புதைகுழிக்கு அருகில் 25.09.2025 முதல் இடம்பெற்று வந்த தொடர் சுழற்சி முறையிலான உண்ணா விரதப் போராட்டம் ஒக்டோபர் 01 வரையும் இடம் பெற்றதுடன் கிழக்கு மாகாணத்தின் திருக்கோவில் பகுதியில் இடம் பெற்றது. இதில் அம்பாறை ,திருகோணமலை, மட்டக்களப்பு போன்ற மாவட்டங்களை சேர்ந்தவர்களும் கலந்து கொண்டனர்.

வடக்கில் செம்மணி பகுதியில் இறுதி நாளன்று குறித்த உண்ணாவிரதப் போராட்டத்தின் போது நம்பிக்கையிழந்த காணாமல் போன உறவுகளை நினைத்து உள்ளகப் பொறிமுறையை வலியுறுத்தி தீப் பந்தப் போராட்டத்தையும் முன்னெடுத்த நிலையில் ஐக்கிய நாட்டு இலங்கை தொடர்பான அறிக்கையும் தீயிட்டு எரிக்கப்பட்டது.

இலங்கையில் நடைபெற்ற உள்நாட்டு யுத்தத்தின் போது நிகழ்த்தப்பட்ட மனித உரிமை மீறல்கள் மற்றும் வலிந்து காணாமல் ஆக்கப்பட்ட விவகாரங்களுக்காக நீதி வேண்டியும் உள்நாட்டு பொறி முறையை நிராகரித்தும், சர்வதேச விசாரணையை வலியுறுத்தியும் செம்மணி மனித புதை குழிக்கு நீதி வேண்டியும் மேலும் குறித்த உண்ணா விரதப் போராட்டத்தை முன்னெடுத்தனர்.