உயிர்த்த ஞாயிறு தாக்குதல்..... முன் பக்கத் தொடர்ச்சி

பாராளுமன்றத்தில் நேற்று புதன்கிழமை நடைபெற்ற கம்பனிகள் திருத்தச் சட்டமூலம் மீதான விவாதத்தில் உரையாற்றும் போதே அவர் இவ்வாறு கூறினார்.

- 

இதன்போது நிசாம் காரியப்பர் மேலும் தெரிவிக்கையில்,

உயிர்த்த ஞாயிறு தாக்குதல் தொடர்பில் இந்த அரசாங்கம் ஆட்சிக்கு வந்த நாள் முதல் வெளிவராத தகவல்கள் முதற்தடவையாக கொழும்பு கோட்டை நீதவான் நீதிமன்றத்தில் 2024 நவம்பர் 24ஆம் திகதி முன்வைக்கப்பட்ட பி அறிக்கையின் ஊடாகவே வெளிவந்தன. இதில் முதல் அறிக்கையாக சனல் 4 அலைவரிசைக்கு வழங்கிய அசரத் மௌலானவினால் வெளியிடப்பட்ட தகவல்களாகும்.

அடுத்ததாக ஆயர் சிறில் காமினிக்கு கிடைத்த வாட்ஸ்அப் தகவலாகும். இந்த சாட்சிகளுக்கமைய இரண்டு சந்தேக நபர்கள் அடையாளம் காணப்பட்டனர். சிவனேசதுரை சந்திரகாந்தன் என்றழைக்கப்படும் பிள்ளையானும், சுரேஷ்சாலே என்பவருமே ஆகும். இவர்களை கைது செய்வதற்கோ, இவர்களை சந்தேக நபர்களாக கைது செய்வதற்கோ நடவடிக்கை எடுக்கப்படவில்லை. அத்துடன் சாரா என்பவர் இறந்துவிட்டதாக காட்டுவதற்கு முன்னெடுக்கப்பட்ட முயற்சிகள் தொடர்பிலும் குறிப்பிடப்பட்டிருந்தது.

ஆனால் இதில் முக்கியமானதாக வவுணதீவில் பொலிஸ் உத்தியோகத்தர்கள் இருவர் கொல்லப்பட்டு அவர்களின் ஆயுதங்கள் கொள்ளையடிக்கப்பட்டமை தொடர்பிலும் அந்த ஆயுதங்கள் சஹ்ரான் குழுவினரால் பயன்படுத்தப்பட்டுள்ளதாகவும் அந்த பி அறிக்கையில் தெரிவிக்கப்பட்டுள்ளது.

இது தொடர்பில் சீஐடியினர் அறிக்கையொன்றையும் முன்வைத்துள்ளனர். அதில் உளவுத் தகவல்களை வழங்குபவர் ஒருவரின் பெயரும் உள்ளது. அவர் தகவல்களை வழங்கியும் புலனாய்வு படையின் கட்டளை அதிகாரிகள் சிலரின் பெயர்களும் குறிப்பிடப்பட்டுள்ளன. அவர்கள் அந்த தகவல்கள் தொடர்பில் உரிய நடவடிக்கை எடுக்கவில்லை. அதன்படி செயற்பட்டிருந்தால் உயிர்த்த ஞாயிறு தாக்குதலை தடுத்திருக்கலாம். இதன்படி உளவு வழங்கியவரின் தகவல்கள் உண்மையானது என்றும் தெரியவந்துள்ளது.

இது தொடர்பான தகவல்கள் வெளியாகியுள்ள போதும் இது வரையில் அந்த புலனாய்வு அதிகாரிகள் எவரும் கைது செய்யப்படவில்லை. இதில் தமிழ் மொழி பெயர்ப்புக்காக சென்ற அப்பாவி ஒருவரே கைது செய்யப்பட்டுள்ளார். ஆனால் கிழக்கு மாகாணத்தின் பாதுகாப்பு படை கட்டளை அதிகாரி பாராளுமன்றத்திற்குள் இருக்கின்றார்.