இசையால் துயர் களைய முயலும் இளையர்

கருணையும் அன்பும் அதிகம் தேவைப்படும் இவ்வுலகில், இசையைக் களமாகப் பயன்படுத்தி மாற்றத்தை ஏற்படுத்த விழைகிறார் மியூசிக் +வைப்ஸ் அமைப்பின் நிறுவனர் அன்ஷ் பிரித்தம் ஒஸ்வல், 20.

- இளவரசி ஸ்டீஃபன்

இந்த அமைப்பு இசையால் வாழ்வை மாற்றுவோம் எனும் இலக்குடன் இயங்குகிறது.

அர்ப்பணிப்புடன் அயராது இயங்கும் இளம் தொண்டூழியர்கள் பலர் அன்ஷுடன் கரம் கோத்துச் செயல்பட்டு வருகின்றனர்.

சிங்கப்பூர் கனிவன்பு இயக்கத்தின் குறிக்கோளாலும் அதன் செயல்பாட்டாலும் ஈர்க்கப்பட்ட அன்ஷுக்கு, அது போன்ற நற்செயல்களில் ஈடுபட்டு சமூகத்தில் ஆக்ககரமான மாற்றம் ஏற்படுத்த வேண்டும் என்ற எண்ணம் உருவானது.

“அதன் அடிப்படையில், அனைவரையும் உள்ளடக்கிய ஒருங்கிணைந்த சமூகத்தை மேலும் வலுவாக்கும் முனைப்புடன், மூத்தோர், அறிவுசார் குறைபாடு உள்ளோர், வசதி குறைந்த குடும்பங்களைச் சார்ந்த சிறார் என அனைவரின் உள்ளத்திலும் ஆனந்தத்தை விதைக்க என்ன செய்யலாம் என்று யோசித்தேன்.

துயரைப் போக்கும் நல் மருந்தாக இசை விளங்கும் எனும் எண்ணம் தோன்றியது. அதன் விளைவுதான் (Music+Vibes) எனும் அமைப்பு,” என விவரித்தார் அன்ஷ்.

இசையினை முக்கிய வாயிலாகக் கொண்டு ஏறத்தாழ நாற்பதுக்கும் மேலான பங்காளிகளுடன் இணைந்து மூத்தோர் உட்பட பல தரப்பினரின் துயர் நீக்கும் நடவடிக்கைகளை மேற்கொள்கிறது இவரது அமைப்பு.

அவ்வகையில், “சின்ன சின்ன ஆசை”, “காதல் கடிதம் தீட்டவே” என மனதை வருடும் பல பாடல்களை மற்றவர்களின் விருப்பத்திற்காக இக் குழுவினர் இசைக்கின்றனர்.