தமிழ் மக்களிடமிருந்து கைநழுவிப் போகின்றதா?

கதிர்காமத்தில் தமிழ் மக்களது பாரம்பரியங்கள் மற்றும் அவர்களது மடங்கள் அடையாளங்கள் அழிக்கப்பட்டமை காரணமாகத் தமிழ் மக்களுக்கும் கதிர்காமத்திற்கும் இடையிலான உறவில் இடைவெளி ஏற்பட்டது என்பது அண்மைக் காலமாகக் கூறப்பட்டு வருகிறது.

- வித்தகர் விபுலமாமணி வி.ரி.சகாதேவராஜா

எனினும், யாழ். செல்வச்சந்நிதி தொடக்கம் வடக்கு கிழக்கு மலையகம் என நாடெங்கிலும் இருந்து பாதயாத்திரை மற்றும் ஏனைய வழிகளில் தமிழர்கள் இலட்சக்கணக்கில் கதிர்காமம் சென்று வருகின்றனர்.

இப் பாதயாத்திரை மறுசீரமைக்கப்பட வேண்டும்; வர்த்தமானி பிரகடனம் செய்யப்பட வேண்டும் என்றெல்லாம் வருடாவருடம் உற்சவ காலப்பகுதியில் கூறுவார்கள். பின்னர் அந்த வேகம் குறைந்து விடும். இம்முறை 50 வீதமானோர் பௌத்தர்கள் சப்பாத்து கண்ணாடி சகிதம் சுற்றுலாப் பயணிகள் போல, பயணித்ததையும் காணமுடிந்தது. ஆனால் வெள்ளைக்காரர்கள் எம்மவர் போல் வேட்டியுடன் திலகமிட்டு பயணித்ததையும் காணமுடிந்தது. எம்மவர்களில் சிலர் பைலாக கும்மாளம் என்று பயணித்தமையும் விமர்சனத்திற்குள்ளாகியுள்ளது

அந்தக் காலத்தில் தமிழருக்கும் கதிர்காமத்திற்கும் நெருங்கிய தொடர்பு காணப்பட்டது. எனினும் இந்தத் தொடர்பு 1977ஆம் ஆண்டுக்குப் பின்னர் குறைவடைந்தது, இடைவெளி ஏற்படத் தொடங்கிவிட்டது.

இதற்குப் பல காரணங்கள் உள்ளன. குறிப்பாக கதிர்காமத்தில் காணப்பட்ட இராமகிருஷ்ண மிஷன் மடத்தை, அரசாங்கம் சுவீகரித்துக்கொண்ட பின்னர், தமிழ் மக்கள் அங்கே செல்வதைக் குறைத்துக் கொண்டார்கள்.

குறித்த கதிர்காமம் இ.கி.மடம் 1953இல் பிரதமர் டட்லி சேனநாயக்காவால் திறந்து வைக்கப்பட்டது.