"89க்கு விசாரணை; 2009க்கு இல்லை”

1989 ஆம் ஆண்டு இடம் பெற்ற பட்டலந்தை சித்திரவதை தொடர்பாக பாராளுமன்ற விவாதம் நடக்கிறது.

- வி.ரி. சகாதேவராஜா

விசாரணை வேண்டுமாம்.ஆனால் 15 வருடங்களுக்கு முன்பு அதாவது 2009 இல் நடந்த தமிழர் படுகொலைக்கு எதுவும் இல்லை.

அரசாங்கம் போலிவேசம் போடுகிறது என மட்டக்களப்பு மாவட்ட பாராளுமன்ற உறுப்பினர் இரா. சாணக்கியன் தெரிவித்தார்..

இவ்வாறு காரைதீவில் ஞாயிற்றுக்கிழமை (30) நடைபெற்ற இலங்கை தமிழரசுக் கட்சியின் காரைதீவு பிரதேச சபையின் வேட்பாளர் அறிமுக கூட்டத்தில் உரையாற்றும் போது மேற்கண்டவாறு தெரிவித்தார்.

கடந்த தேர்தலின் பொழுது தமிழ் அரசியல் கைதிகள் படிப்படியாக விடுவிக்கப்படுவார்கள் என்று கூறிய அமைச்சர் விமல் ரத்நாயக்க, யாழ்ப்பாணத்தில் பேசிய போது அவர்களை விடுதலை செய்ய முடியாது என்று தெரிவித்திருக்கிறார். இதிலிருந்து அவர்களது வேஷம் என்ன என்பதை மக்கள் அறிய வேண்டும் என்றார்.

2024 தேர்தலில் யாழ்ப்பாணத்தில் மூன்று எம்பிக்களை பெற்றுக் கொண்ட திமிரில் அரசாங்கம் இன்று ஆனையிறவு உப்புக்கு றஜலுணு என பெயரிட்டுள்ளது.

தமிழர்களின் அபிலாசை இதுவா? என்று கேட்கின்றோம். நிரந்தரமான அரசியல் தீர்வு ஒன்றுதான் எமது அபிலாசை. பாருங்கள் இன்று உப்பின் பெயரே பிரச்சினையாக இருக்கிறது.