ONDERWYSKRISIS: Duísende poste vakant, skole sonder hulpbronne, en leerders sonder kos

Stellalander-Vryburg, Kinders sit honger in klaskamers sonder onderwysers, in skole sonder water of elektrisiteit - en die vraag bly: wat doen provinsiale onderwysdepartemente met al die geld?

- 

Suid-Afrika bevind hom reeds midde-in die skooljaar, en tog is daar steeds meer as 29 000 vakante onderwysposte in openbare skole landwyd - poste wat reeds in Januarie gevul moes wees.

"Ons is besig om 'n nasionale ramp te aanskou," waarsku dr. Jaco Deacon, uitvoerende hoof van FEDSAS (Federasie van Beheerliggame van Suid-Afrikaanse Skole). Volgens hom is daar begroot vir hierdie poste, en die fondse is reeds lankal aan die onderskeie provinsiale onderwysdepartemente oorbetaal. Nog meer kommerwekkend is dat slegs drie van die nege provinsies teen die wetlik voorgeskrewe sperdatum van 15 Mei die nodige oordragbetalings aan skole gemaak het.

"Dit beteken departemente het miljoene rande ontvang vir personeel én vir skoolfondse sonder om hul wetlike pligte na te kom. Enige ander gebruik van hierdie fondse is onwettig. In wese word geld by kinders gesteel," sê Deacon.