Departement gereed om bek-en-klouseer te beheer

Limpopo word nou ook deur bek-enklouseer (BKS) geraak nadat gevalle van dié hoogs aansteeklike siekte reeds hier aangemeld is.

- Barry Viljoen

Nader aan die stad, is gevalle in die omgewing van die wawielbrug langs die N1 bevestig en die plase is onmiddelik onder kwarantyn geplaas en geen beweging word in of uit en deur hierdie gebiede en plase toegelaat nie.

Die Landbounavorsingsraad (LNR) het verlede Donderdag die vrystelling van die eerste bondel van 12 900 dosisse van 'n plaaslik-vervaardigde multi-stem BKS-entstof aangekondig en aangedui dat 2 000 dosisse aanvanklik vir Limpopo bestem is.

Die Minister van Landbou, John Steenhuisen het verlede week bevestig dat die departement gereed is om die situasie te hanteer en dat die balans aan die Oos-Kaap, Vrystaat, Noordwes, Gauteng en Mpumalanga toegeken is. BKS bly egter 'n staatsbeheerde siekte en die staatsveearts neem die verantwoordelikheid vir die bekamping en beheer van die siekte saam met rolspelers.