Klein gebaar met groot liefde, omgee

Tyd is 'n kommoditeit waaroor almal beskik, al voel dit soms asof dit eenvoudig nooit genoeg is nie. Tog kan elkeen iewers 'n paar minute afknyp om iemand in nood te help. Vir party mense is tyd juis die grootste geskenk wat hulle kan aanbied.

- Maretha Swanepoel

By Koraal Aftreeoord kom 'n groep toegewyde vroue elke Maandag bymekaar. Terwyl daar heerlik gesels word, is hul hande besig om poppies te brei. Hierdie poppies word geskenk aan Stop Trafficking of People (Stop), om sodoende aan kinders in uitdagende omstandighede oorhandig te word.