தாயாருடன் பழகி வந்த நிதிநிறுவன மேலாளருடன் காதல் மோகம்: கூலிப்படையை ஏவி கணவனை தீர்த்துக் கட்டிய இளம்பெண்!

திருமணமான ஒரு மாதத்தில் அரங்கேறிய கொடூரம்!!

- 

தெலுங்கானாவில் திருமணமான ஒரு மாதத்தில் கட்டிய கணவனை மனைவியும், அவளது காதலனும் சேர்ந்து கூலிப்படையை ஏவி கொலை செய்த சம்பவம் பெரும் அதிர்ச்சியை ஏற்படுத்தியுள்ளது. மேகாலயாவில் தேனிலவு ஜோடி கொலை சம்பவத்தைப் போலவே இந்த படுகொலையும் தெலுங்கானாவில் அரங்கேறியுள்ளது.

இந்த கொலை வழக்கில் கொலை செய்யப்பட்டவரின் மனைவி, அந்தப் பெண்ணின் தாய், காதலன் மற்றும் கூலிப்படையினர் உள்பட எட்டுப் பேர் இதுவரை கைது செய்யப்பட்டு விசாரிக்கப்பட்டு வருகின்றனர்.

தெலுங்கானா மாநிலம் ஜோகுலாம்பா கட்வால் மாவட்டத்தில் ராஜவீதி நகரில் வசிக்கும் ஓய்வு பெற்ற ஊழியர் காந்தா ஜெயராம்-சகுந்தலா தம்பதியின் இளைய மகன் காந்தா தேஜேஷ்வர் (வயது 32). இவர் தனியார் நிறுவனம் ஒன்றில் சர்வேயராகப் பணிபுரிந்து வந்தார்.

இவருக்கும் ஆந்திர மாநிலம் கர்னூலைச் சேர்ந்த ஐஸ்வர்யா என்பவருக்கும் கடந்த ஆண்டு டிசம்பரில் திருமணம் நிச்சயிக்கப்பட்டு பிப்ரவரியில் திருமணம் நடைபெறுவதாக இருந்தது. எனினும் திருமணம் நடக்கவிருந்த சமயத்தில் ஐஸ்வர்யா தனக்கு இந்தக் கல்யாணத்தில் விருப்பமில்லை என்று கூறி வீட்டை விட்டு வெளியேறி மாயமாகிவிட்டார்.

இதனால் தேஜேஷ்வர் மற்றும் அவரது குடும்பத்தினர் குழம்பிப் போயினர். எனினும், சில தினங்களுக்குப் பிறகு மீண்டும் திரும்பி வந்த ஐஸ்வர்யா, தனக்கு மாப்பிள்ளையைப் பிடித்திருக்கிறது, திருமணத்திற்குச் சம்மதம் என்று கூறியதுடன், தனது பெற்றோர், திருமணச் செலவுகளுக்குக் கஷ்டப்படுவதைத் தன்னால் பார்க்க முடியவில்லை, அதனாலேயே வீட்டை விட்டு வெளியேறியதாகக் கூறியுள்ளார்.

ஐஸ்வர்யா சொன்னதை நம்பிய தேஜேஷ்வர், தன் பெற்றோரை சமாதானம் செய்து திருமணத்திற்கு ஏற்பாடு செய்தார். அதன்படி, கடந்த மே 18-ம் தேதி இரு வீட்டுப் பெற்றோர்கள் மற்றும் உறவினர்கள் முன்னிலையில் திருமணம் நடைபெற்றது.

ஆனால் திருமணம் முடிந்த பிறகு தேஜேஷ்வருக்கு மனைவியின் போக்கில் வித்தியாசம் தென்பட்டது. கணவனுடன் பேசுவதைத் தவிர்த்த ஐஸ்வர்யா, போனில் பல மணி நேரம் யாருடனோ தொடர்ந்து ரகசியமாகப் பேசிக்கொண்டே இருந்திருக்கிறார். இதனைக் கவனித்த தேஜேஷ்வர் மனைவியின் போக்கைக் கண்டித்துள்ளார்.