પીરાણામાં રોજ 300 ટન કચરામાંથી કોલસો બનાવવાનો પ્રોજેક્ટ

ડમ્પ સાઈટ ઝડપથી ક્લિયર કરવા આયોજન પીરાણામાં ૩ એકર જમીન ફાળવાશે, પ્રોજેક્ટ સ્થાપનાર કંપની મ્યુનિ.ને રોયલ્ટી ચૂકવશે

- 

શહેરભરમાંથી કચરાને પીરાણા ડમ્પ સાઇટ પર ઠાલવવામાં આવે છે. પીરાણા ડમ્પ સાઇટ ખાતેના કચરાના ડુંગર નાબૂદ કરવાના પ્રયાસોના ભાગરૂપે દરરોજ ૩૦૦ ટન કચરામાંથી કોલસો બનાવવાનો પ્રોજેક્ટ સ્થાપવા મ્યુનિ.એ ટેન્ડર બહાર પાડી દીધા છે.

મ્યુનિ. સૂત્રોના જણાવ્યા અનુસાર, છેલ્લા કેટલાય વર્ષોથી સમગ્ર શહેરનો કચરો પીરાણા ખાતે ઠાલવતાં રહેવાના કારણે તેમજ કચરાનો કોઇ નિકાલ કરવાની યોજના કે પ્રોજેક્ટ અમલમાં નહીં મૂકાવાના કારણે પીરાણા ખાતે કચરાના ડુંગર વધતા ગયાં છે અને હવે તેનાથી અનેક પ્રકારના પોલ્યુશનમાં વધારો થયો છે.