મ્યુનિ. કમિટીઓના ચેરમેનપદ માટે નો-રિપિટ થિયરીઃ નવું વર્ષ કોને ફળશે તેની અનેકાનેક અટકળો

નવેમ્બરની 27મીએ તમામ કમિટીના ચેરમેન-ડે.ચેરમેનની વરણી કરાશે લોકસભા તથા મ્યુનિ.ચૂંટણીને ધ્યાનમાં રાખી યોગ્ય સિનિયરોને જવાબદારી સોંપવા કોર્પોરેટરો-કાર્યકરોની લાગણી

- 

મ્યુનિ.ની સર્વોચ્ચ ગણાતી સ્ટે.  કમિટી સહિત ટોચના હોદેદારોની વરણી બાદ ભાજપ નેતાગીરીએ વિવિધ કમિટીઓના ચેરમેન અને ડે.ચેરમેનની વરણી માટે ૨૭મી નવેમ્બરની તારીખ પસંદ કરી હોવાનુ જાણવા મળ્યુ છે અને તેમાં નોરિપિટ થિયરી લાગુ પાડવાની વાતથી ભાજપના કોર્પોરેટરો તથા કાર્યકરોમાં જ કચવાટની લાગણી ફેલાવા પામી છે.

મ્યુનિ.ભાજપના સૂત્રોમાંથી પ્રાપ્ત વિગતો અનુસાર, ચાલુ વર્ષની ટર્મમાં ભાજપ નેતાગીરીની આંતરિક ખેંચતાણને કારણે હોદ્દેદારો તથા કમિટીઓની રચનામા વિલંબ થયો હતો, તેથી મ્યુનિ. ચૂંટણી બાદ નવી બોડીની રચના થઇ ત્યારથી અઢી વર્ષની મુદત ગણવાને બદલે કમિટીઓની રચના થઇ ત્યારથી અઢી વર્ષની મુદત ગણવાનો વિવાદાસ્પદ નિર્ણય લેવાયો છે. તેનાથી વર્તમાન કમિટી ચેરમેનો અને ડે. ચેરમેનોને ફાયદો થયો છે, પરંતુ હવે ૨૭મી નવેમ્બરે જે કોઇ કોર્પોરેટરને શિરે કમિટી ચેરમેન કે ડે.ચેરમેનનો કળશ ઢોળાશે તેમને અઢી વર્ષની મુદત મળશે નહીં.