કેમિકલ વેપારીના નબીરા પત્રે મર્સિડીઝથી રેસ લગાવી બે કારને હડકેટે લીધી

અકસ્માત: સિંધુભવન રોડ પરની ઘટના : ગાડીની સ્પીડ એટલી હતી કે રોડ પર તણખા થયા, આગળનું ટાયર પણ નીકળી ગયું : અકસ્માત બાદ લોકોએ કારચાલકને પોલીસ હવાલે કર્યો રિશીત પટેલની ધરપકડ : આરોપી નશાની હાલતમાં હોવાનો લોકોનો આક્ષેપ

- 

સિંધુભવન રોડ પર વધુ એક અકસ્માત નોંધાયો છે. કેમિકલ વેપારીના નબીરાએ આ રોડ પર અકસ્માત સર્જી બે ગાડીને અડફેટે લીધી હતી. તથ્ય પટેલ ભલે જેલમાં બંધ હોય પણ તેના જેવા અન્ય નબીરાઓ બેફામ હોય તેમ એક બાદ એક અકસ્માતની ઘટનાઓ સામે આવી રહી છે. સાયન્સ સિટી રોડ પર રહેતા એક નબીરાએ તેની મર્સિડીઝ ગાડી પૂરઝડપે ચલાવી અન્ય ગાડી સાથે રેસ લગાવી મોડી રાત્રે ત્રણ વાગ્યે બે ગાડીઓને અડફેટે લીધી હતી. આરોપી જ્યારે કાર ચલાવતો હતો ત્યારે સીસીટીવીમાં તે ઘટના કેદ થઇ હતી અને તેમાં કાર ચલાવતી વખતે રોડ પર તણખા થતા હોવાનું પણ દેખાયું હતું. અકસ્માત સર્જાયો ત્યારે આરોપીની ગાડીનું ટાયર પણ નીકળી જતા પૂરઝડપે ગાડી હંકારી હોવાનું સામે આવ્યુ છે. ત્યારે લોકોએ કારચાલકને પકડ્યો ત્યારે તે નશાની હાલતમાં હોવાનો લોકોએ આક્ષેપ કર્યો હતો.