ભાવ વધારા, જીએસટી અને અગ્નિપથ સ્કીમ મામલે સંસદના બંને ગૃહોમાં હોબાળો

કોંગ્રેસ, એનસીપી, શિવસેના સહિતના વિરોધ પક્ષના નેતાઓએ સંસદ પરિસરમાં સરકાર વિરોધી સુત્રોચ્ચાર કર્યા સતત પાંચમાં દિવસે સંસદના બંને ગૃહોની કામગીરી અવરોધાઈઃ અગ્નિપથ સ્કીમ અંગે સરકાર તથ્યો છુપાવતી હોવાનો આક્ષેપ

- 

સંસદમાં વિરોધ પક્ષોએ શુક્રવારે પણ હંગામો મચાવીને બન્ને ગૃહની કામગીરી ખોરવી નાખી હતી. આવશ્યક ચીજવસ્તુઓ ૫૨ જીએસટી નાખવા ઉપરાંત અગ્નિપથ જેવી યોજના સામે વિરોધ પક્ષોના સભ્યોએ ભારે હોબાળો મચાવ્યો હતો. જેને પગલે સંસદના બન્ને ગૃહોમાં કામગીરી અવરોધાઇ હતી.

કોંગ્રેસ, એનસીપી, સીપીઆઇ, સીપીઆઇ-એમ, શિવસેના, ડીએમકે, આરએસપી અને અન્ય કેટલાક પક્ષોના નેતાઓ મહાત્મા ગાંધીની પ્રતિમા બહાર એકત્ર થયા હતા અને સરકાર વિરોધી સુત્રોચ્ચાર કર્યા હતા. પ્લેકાર્ડ્સ અને બેનરો હાથમાં લઇને વિરોધ પક્ષોના સભ્યોએ સંસદમાં વડાપ્રધાનની હાજરીની માગણી કરી હતી અને વધતી મોંઘવારી અને આવશ્યક ચીજવસ્તુઓ પર જીએસટીના વધારા જેવી ચિંતાઓનો ઉકેલ લાવવાની માગણી કરી હતી.

વિરોધ પક્ષો આ તમામ મુદાઓ પર સંસદમાં ચર્ચાની માગણી કરી રહ્યા છે. ૧૮ જુલાઇએ શરૂ થયેલા ચોમાસા સત્રની શરૂઆત વિપક્ષોના હોબાળાનો ભોગ બન્યું છે. છેલ્લાં પાંચ દિવસથી સંસદના બન્ને ગૃહોની કામગીરી અવરોધાઇ છે.