Nog soveel vrae oor ongeluk

Dit is reeds agt maande na die gru-botsing waarin vier jongmense van die stad dood is, en niemand is nog aangekla nie.

- Deur Salomé Kotzé

Die prokureur wat die Mercedes Benz bestuur het wat teen die blou Renault Clio gebots het, het nou nog geen verklaring oor wat die aand van 13 Oktober gebeur het, by die polisie afgelê nie. Hy het daardie aand die ongelukstoneel verlaat en twee dae later by die polisiestasie aangemeld waar 'n waarskuwerklaring geneem is wat sy regte aan hom verduidelik het. Hy sou 'n verklaring oor die gebeure by sy prokureur aflê, wat deel van die polisie-ondersoek is, maar tot vandag toe is dit nie gedoen nie.

Dit is vir Cherice Grobler 'n bitter pil om te sluk. Haar broer, Ruan Esterhuizen, het die blou Renault Clio bestuur. Saam met hom in sy motor, was sy meisie, Jackie Willis, en nog 'n paartjie, Max Knott-Craig en Jané Janse van Rensburg. Nie een van hulle het die botsing oorleef nie.