Klerksdorp, die stad van goud

Sedert Klerksdorp se ontstaan in 1837 (toe 12 Voortrekker gesinne hulle tussen Oudorp Koppies en Skoonspruit gevestig het in wat ons vandag ken as Klerksdorp Oudorp), was die stad niks meer as 'n klein plattelandse nedersetting nie. Klerksdorp Museum se historikus verskaf 'n blik op die vroeë goudmynbedryf in Klerksdorp.

- 

Klerksdorp Rekord, Klerksdorp - Mens kon Klerksdorp beswaarlik 'n dorp noem, aangesien dit slegs een straat (Hendrik Potgieterstraat, die wapad wat voor die klein aantal huise se voordeure verbygeloop het), en enkele ander geboue soos die kerk en Taylor en Leask Algemene Handelaar gehad het.

Dit sou alles in 'n ommesientjie verander na MG Jansen van Vuuren se ontdekking van goud op sy plaas Ysterspruit in die Klerksdorp distrik. Hoewel hy nooit hierdie goud ontgin het nie, het Van Vuuren wel die ZAR regering per brief gedateer November 1885, daaroor ingelig. Thomas Leask (wat teen hierdie tyd wyle JA Taylor se aandeel in die Algemene Handelaar uitgekoop het) het van die gerugte van goud te hore gekom en dadelik begin om minerale regte op verskeie plase en eiendomme rondom Klerksdorp uit te koop.