Hierdie kind het net een kans gehad

Maryke, via e-pos - Verlede week het twee dinge ons nuus oorheers - en die verskil tussen hulle is vir my hartverskeurend.

- Maryke, via e-pos

Aan die een kant was daar die nuus dat President Ramaphosa vir Donald Trump gaan sien. En ja, almal het 'n opinie. Die een kamp juig. Die ander kamp skree. Facebook en sosiale media loop oor.

Maar dan is daar iets anders - iets veel nader aan my, beide fisies en emosioneel. Net tien kilometer van my huis af, op Stilfontein, is 'n tweejarige seuntjie dood. Nie aan 'n siekte nie. Nie in 'n ongeluk nie. Dood as gevolg van verwaarlosing.

'n Kind wat beseer, mishandel, en uiteindelik verlos is van 'n lewe waarin hy blykbaar nooit veilig was nie. Sy ouers en grootouers was almal betrokke by dwelms. En al was maatskaplike werkers en SAPD betrokke, was dit te laat - hy is dood.