Kombrinks saam op Paarlberg, elk met eie wedloop

George se uitmuntende ultra-atleet Lodelia Kombrink het tydens die naweek van 5 en 6 Desember haar titel by die Rock Ultra 100 km-bergwedloop in die Paarl suksesvol verdedig en bewys waarom sy as een van die taaiste bergatlete in Suid-Afrika beskou word.

- Hugo Redelinghuys

Dié uitmergelende wedloop het Vrydagaand om 19:00 afgeskop en deelnemers diep die Paarlberg ingevat, met strawwe 4x4-roetes, tegniese enkelpaadjies en lang ure van fisieke en geestelike uitputting.

Wat hierdie oorwinning egter besonders maak, is dat Kombrink vanjaar sonder die fisieke ondersteuning van haar man, Divan, moes klaarkom. Nie omdat hy nie daar wóú wees nie, maar omdat hy self aan die begin van 'n nuwe reis as atleet staan.