அதிகாரப் பகிர்வுக்குத் தயாராகும் சீனா

சீனாவின் ஆளும் கட்சியான சீன கம்யூனிச கட்சியின் பொதுச் செயலரும் அந்த நாட்டு அதிபருமான ஷி ஜின்பிங் (72) கட்சியின் துணை அமைப்புகளுக்கு அதிகாரத்தை பகிர்ந்தளிக்கத் தொடங்கியிருப்பதாக அந்த நாட்டு ஊடகங்களில் தெரிவிக்கப்பட்டது.

- 

பெய்ஜிங், ஜூலை 7:

3-ஆவது முறையாக அதிபராகப் பதவி வகித்து வருபவரும் 'வாழ்நாள் அதிபர்' என அழைக்கப்படுபவருமான ஷி ஜின்பிங் தனது 12 ஆண்டுகால ஆட்சியில் முதல்முறையாக அதிகாரப் பகிர்வை மேற்கொள்ளத் தொடங்கியுள்ளார். இதன்மூலம் அவர் அரசியலில் இருந்து ஓய்வு பெறுவதற்கு முன் சுமுகமான முறையில் அதிகார மாற்றம் நடைபெற வழிவகுத்து வருவதாகக் கூறப்படுகிறது.

இதுகுறித்து சீன அரசு ஊடகமான ஜின்ஹுவா வெளியிட்ட செய்தியில், கடந்த ஜூன் 30-ஆம் தேதி சீன கம்யூனிஸ்ட் கட்சியின் மிக அதிகாரமிக்க 24 உறுப்பினர்களைக் கொண்ட அரசியல் குழுவின் கூட்டம் நடைபெற்றது. அதிபர் ஷி ஜின்பிங் தலைமையில் நடைபெற்ற இந்தக் கூட்டத்தில் கட்சி கட்டமைப்பில் பல்வேறு புதிய விதிகளை மறு ஆய்வு செய்யப்பட்டது.