இந்திய சூரிய எரிசக்திக் கழகத்தின் தலைவர் திடீர் நீக்கம்

காங்கிரஸ் விமர்சனம்

- 

புது தில்லி, மே 12: இந்திய சூரிய எரிசக்திக் கழகத்தின் (எஸ்இசிஐ) தலைவர், தலைமை இயக்குநராகப் பதவி வகித்து வந்த ரமேஷ்வர் பிரசாத் குப்தா மத்திய அரசால் திடீரென நீக்கப்பட்டார்.

இதையடுத்து, அதானி கிரீன் நிறுவனம் விநியோகிக்கும் சூரிய மின்சக்தியை இந்திய சூரிய எரிசக்திக் கழக நிறுவனத்திடமிருந்து வாங்க இந்திய அரசு அதிகாரிகளுக்கு தொழிலதிபர் கௌதம் அதானி ரூ.2,000 கோடி லஞ்சம் கொடுத்த வழக்கை மூடி மறைக்கவே ரமேஷ்வர் பிரசாத் குப்தாவை மத்திய அரசு நீக்கியதாக காங்கிரஸ் விமர்சித்தது.

1987, குஜராத் பிரிவைச் சேர்ந்த முன்னாள் ஐஏஎஸ் அதிகாரியான ரமேஷ்வர் பிரசாத் குப்தா கடந்த 2023, ஜூன் 13-ஆம் தேதி எஸ்இசிஐயின் தலைவர் மற்றும் தலைமை இயக்குநராக இரண்டு ஆண்டுகளுக்கு நியமிக்கப்பட்டார். அவர் ஜூன் 15-ஆம் தேதி பதவியேற்றார்.

தற்போது அவரது பதவிக் காலம் நிறைவடைவதற்கு ஒரு மாத காலத்துக்கு முன்பாகவே நீக்கப்பட்டுள்ளார்.