தினமும் ஒரு மணி நேர புத்தக வாசிப்பு அவசியம்

இளைஞர்களுக்கு முதல்வர் மு.க.ஸ்டாலின் அறிவுரை

- 

இளைஞர்கள் தினமும் ஒரு மணி நேரமாவது புத்தகம் வாசிக்கும் பழக்கத்தை வளர்த்துக் கொள்ள வேண்டும் என முதல்வர் மு.க. ஸ்டாலின் அறிவுரை கூறினார்.

தென்னிந்திய புத்தக விற்பனையாளர்கள் மற்றும் பதிப்பாளர்கள் சங்கத்தின் (பபாசி) சார்பில் 49-ஆவது சென்னை புத்தகக் காட்சியை நந்தனம் ஒய்எம்சிஏ மைதானத்தில் முதல்வர் மு.க. ஸ்டாலின் வியாழக்கிழமை தொடங்கி வைத்து அங்குள்ள அரங்குகளைப் பார்வையிட்டார்.

தொடர்ந்து, படைப்பாளர்கள் சுகுமாரன் (கவிதை), ஆதவன் தீட்சண்யா (சிறுகதை), இரா.முருகன் (நாவல்), பாரதி புத்திரன் (உரைநடை), கே.எஸ். கருணா பிரசாத் (நாடகம்), வ.கீதா (மொழிபெயர்ப்பு) ஆகியோருக்கு 'முத்தமிழறிஞர் கலைஞர் மு. கருணாநிதி பொற்கிழி விருது'-களை வழங்கி முதல்வர் பேசியதாவது:

தென்னிந்திய புத்தக விற்பனையாளர்கள் மற்றும் பதிப்பாளர்கள் சங்கத்தால் கடந்த 1977-இல் தொடங்கிய அறிவுப்பணி, 49-ஆவது ஆண்டாக தொடர்ந்து கொண்டிருக்கிறது. அப்போது 13 அரங்குகளுடன் தொடங்கப்பட்ட புத்தகக் கண் காட்சி, இன்று 900 அரங்குகளுடன் இருப்பதே, இதன் வெற்றிக்கான சாட்சியாக அமைந்திருக்கிறது. இன்னும் அதிகளவிலான மக்கள், இந்தக் கண்காட்சிக்கு வரவேண்டும் என்பதற்காக நுழைவுக் கட்டணத்தை ரத்து செய்திருப்பது வரவேற்புக்குரியது.