கவிஞர் புவியரசு (94) காலமானார்

கோவை வானம்பாடி கவிதை இயக்கத்தின் நிறுவனர்களில் ஒருவரும், இருமுறை சாகித்திய அகாதெமி விருது பெற்றவருமான கவிஞர் புவியரசு (94) உடல்நலக் குறைவால் கோவையில் செவ்வாய்க்கிழமை (ஜூன் 30) காலமானார்.

- 

திருப்பூர் மாவட்டம், உடுமலைப்பேட்டை அருகே உள்ள லிங்கவநாயக்கன்புதூரில் சுப்பையா-தாயம்மாள் தம்பதிக்கு மகனாக 19.9.1931-இல் பிறந்தார். இவரது இயற்பெயர் சு. ஜெகந்நாதன். சம்ஸ்கிருதத்தில் இருந்த தனது பெயரை புவியரசு என்று தமிழ்ப்படுத்திக்கொண்டார். கோவை அரசு கலைக் கல்லூரியில் இன்டர்மீடியட் பட்டமும், பேரூர் சாந்தலிங்க அடிகளார் தமிழ்க் கல்லூரியில் தமிழ் வித்வான் பட்டமும் பெற்ற இவர், சென்னை சைதாப்பேட்டை ஆசிரியர் பயிற்சிக் கல்லூரியில் தமிழாசிரியர் பயிற்சியும், தில்லியில் காந்தியவியலில் மருத்துவப் பட்டயமும் பெற்றவர்.

தமிழ் மட்டுமன்றி மலையாளம், ஆங்கிலத்திலும் புலமை பெற்றவர். கோவை சுதந்திரா உயர்நிலைப் பள்ளி, தியாகி என்.ஜி.ஆர். உயர்நிலைப் பள்ளி, சர்வ ஜனா உயர்நிலைப் பள்ளி, ஸ்ரீ சே. ப. நரசிம்மலு நாயுடு உயர்நிலைப் பள்ளிகளில் 1957-ஆம் ஆண்டு முதல் 1989-ஆம் ஆண்டு வரை 32 ஆண்டுகள் தமிழாசிரியராகப் பணியாற்றி ஓய்வு பெற்றவர்.

முதுமை காரணமாக பெரியநாயக்கன்பாளையம் பிரஸ் காலனி பகுதியில் உள்ள தனது இல்லத்தில் ஓய்வில் இருந்து வந்த புவியரசு செவ்வாய்க்கிழமை காலை காலமானார். இவரது இறுதிச்சடங்குகள் பெரியநாயக்கன்பாளையத்தில் உள்ள மின்மயானத்தில் புதன்கிழமை காலை 9 மணிக்கு நடைபெறுகிறது. கவிஞர் புவியரசின் மனைவி ஜெகதா சில ஆண்டுகளுக்கு முன்பு காலமாகிவிட்டார். இவர்களுக்கு மலர்விழி, பாக்கியலட்சுமி ஆகிய இரு மகள்கள் உள்ளனர்.