அமெரிக்க-ஈரான் அணுசக்திப் பேச்சு

ஈரானின் அணுசக்தி திட்டங்கள் தொடர்பாக அந்த நாட்டிற்கும் அமெரிக்காவுக்கும் இடையிலான இரண்டாம் கட்டப் பேச்சுவார்த்தை இத்தாலி தலைநகர் ரோமில் சனிக்கிழமை தொடங்கியிருக்கிறது.

- 

ஓமனை மத்தியஸ்தராக வைத்துக் கொண்டு இரு நாடுகளும் மறைமுகமாக நடத்தும் இந்தப் பேச்சுவார்த்தை, ரோம் நகரிலுள்ள ஓமன் தூதரகத்தில் மூடிய அறைக்குள் தொடங்கியது.

ஓமனில் கடந்த வாரம் நடைபெற்ற இந்தப் பேச்சுவார்த்தையில் அமெரிக்காவுக்காகப் பங்கேற்ற அதிபர் டொனால்ட் டிரம்ப்பின் சிறப்புத் தூதர் ஸ்டீவ் விட்காஃப் இந்தக் கூட்டத்திலும் பங்கேற்கிறார். அதேபோல், ஈரான் வெளியுறவுத்துறை அமைச்சர் அப்பாஸ் அராக்சியும் இந்தப் பேச்சுவார்த்தையில் கலந்துகொள்கிறார்.

விட்காஃபும் அராக்சியும், முக்கிய விவகாரங்களில் ஒருமித்த கருத்தை எட்டுவார்களா என்பது தொடர்ந்து கேள்விக் குறியாகவே உள்ளது.

அணு ஆயுதம் தயாரிக்கும் எண்ணம் இல்லை என்று ஈரான் தொடர்ந்து அழுத்தமாகக் கூறிவருகிறது. இருந்தாலும், தங்கள் மீது விதிக்கப்பட்டுள்ள பொருளாதாரத் தடைகளுக்கு எதிர்ப்பு தெரிவிக்கும் வகையில் மின் உற்பத்திக்குத் தேவையானதைவிட அதிக செறிவுடன் அணு சக்தி எரிபொருளான யுரேனியத்தை அந்த நாடு வைத்துள்ளது.

இந்தச் சூழலில், அணு ஆயுதம் தயாரிக்கப்போவதில்லை என்பதை உறுதி செய்வதற்கான ஒப்பந்தத்தை தங்களுடன் ஈரான் உடனடியாக ஏற்படுத்திக்கொள்ளாவிட்டால் அந்த நாட்டின் மீது இதுவரை இல்லாத மிகக் கடுமையான தாக்குதல் நடத்தப்படும் என்று டிரம்ப் மிரட்டல் விடுத்ததற்குப் பிறகுதான் இரு நாடுகளும் தற்போது இந்தப் பேச்சுவார்த்தையை நடத்திவருகின்றன.