ஆசிரியர்களின் வாக்குகளைப் பெற போராடும் 'கழகங்கள்'!

தமிழகத்தில் நடைபெறவுள்ள சட்டப்பேரவைத் தேர்தலில் இதுவரை இல்லாத அளவுக்கு வாக்குகள் பிரியும் சூழல் ஏற்பட்டுள்ளதால், லட்சக்கணக்கான ஆசிரியர்களின் வாக்குகளை கொத்துக் கொத்தாக அறுவடை செய்ய திமுக, அதிமுக இடையே கடும் போட்டி ஏற்பட்டுள்ளது.

- - அ. ஜெயச்சந்திரன்

தமிழகத்தில் 44,500-க்கும் மேற்பட்ட அரசு, அரசு உதவி பெறும் பள்ளிகளில் 3.25 லட்சம் ஆசிரியர்கள் பணியாற்றி வருகின்றனர். இத்துடன் ஆயிரக்கணக்கில் பகுதி நேர மற்றும் தற்காலிக ஆசிரியர்கள், அவர்களது குடும்பத்தினர் எனக் கணக்கில் கொண்டால் குறைந்தபட்சம் 10 லட்சத்துக்கும் மேற்பட்ட வாக்குகள் ஆசிரியர்கள் வசம் உள்ளன.

தமிழகத்தில் ஆசிரியர்களுக்காக 100-க்கும் மேற்பட்ட சங்கங்கள் செயல்பட்டு வரும் நிலையில் அவர்களது வாக்குகள் சிதறி விடாமல் மொத்தமாகப் பெறும் முயற்சிகளை ஆளுங்கட்சி ஏற்கெனவே பல்வேறு செயல் திட்டங்கள் வாயிலாக தொடங்கிவிட்டது.