பாகிஸ்தானின் புதிய மன்னர்

பாகிஸ்தானை பயங்கரவாதத்தை நோக்கி இழுத்துச் செல்வதில் அந்நாட்டு அரசியல் தலைமையைவிட ராணுவத் தலைமையே முக்கியப் பங்கு வகித்து வருகிறது.

- சு. வெங்கடேஸ்வரன்

கடந்த சுமார் 78 ஆண்டு கால பாகிஸ்தானின் வரலாற்றில் 35 ஆண்டுகளுக்கு மேல் ராணுவத் தலைமையின் ஆட்சியே அங்கு நடைபெற்று வந்துள்ளது. இடைப்பட்ட காலத்திலாவது மக்களால் தேர்வு செய்யப்பட்ட அரசுதான் ஆட்சியில் இருந்ததா என்றால் அதுவும் கேள்விக் குறிதான். பாகிஸ்தான் பிரதமர்களில் பெரும்பாலானோர் ராணுவ தலைமைத் தளபதிகளின் நிழலில் அமர்ந்துதான் ஆட்சி நடத்தியுள்ளனர். பிரதமர் தங்களை மீறி அதிகாரம் செலுத்தினால் பதவியில் மட்டுமல்ல, நாட்டிலும், ஏன் உலகத்திலேயே கூட இருக்க முடியாது என்பதை பாகிஸ்தான் ராணுவ தலைமைத் தளபதிகள் நிரூபித்துள்ளனர்.

பொதுவாக ராணுவத்தின் பணி என்பது வெளிநாடுகளில் இருந்தும் எல்லைக்கு அப்பால் இருந்து வரும் அச்சுறுத்தல்களை எதிர்கொண்டு தேசத்தைக் காப்பதே. ஆனால், பாகிஸ்தானில் மட்டும் ஆட்சியையும் அரசியலையும் ராணுவ தளபதிகள் பின்னின்று இயக்குவது வாடிக்கை.

பாகிஸ்தான் சுதந்திரம் அடைந்து 10 ஆண்டுகளிலேயே 1958-இல் பாகிஸ்தானில் ராணுவம் ஆட்சியைப் பிடித்தது. அப்போதைய ராணுவ தலைமைத் தளபதி அயூப் கான், தனது சகாக்கள் மூலம் பிரதமர் இஸ்கந்தர் மிர்சாவை பிரிட்டனுக்கு நாடு கடத்தியதுடன், நாட்டின் அதிபராகவும் தன்னை நிலைநிறுத்திக் கொண்டார்.