பயங்கரவாதிகள் நம் எதிரிகள்!

ஜம்மு-காஷ்மீரின் பஹல்காம் அருகேயுள்ள பைன் மரக்காடுகள் அடர்ந்த மலையால் சூழப்பட்ட பைசாரன் பள்ளத்தாக்கு உலகளாவிய சுற்றுலாப் பயணிகள் கோடைக்காலத்தில் கூடும் பகுதி.

- 

கோடை விடுமுறையைக் கழிக்க அங்கே கூடியிருந்த 2,000-க்கும் அதிகமான சுற்றுலாப் பயணிகள் மீது பயங்கரவாதிகள் செவ்வாய்க்கிழமை (ஏப்.22) நடத்திய கொடூரத் தாக்குதல் உலகளாவிய அளவில் அதிர்ச்சியை ஏற்படுத்தியிருக்கிறது; கண்டனத்தையும் எழுப்பியிருக்கிறது.

இஸ்லாமிய நாடுகள் உள்பட உலக நாடுகள் அனைத்தும் பயங்கரவாதத்தை எதிர்கொள்ளும் இந்தியாவுடன் தோளோடு தோள் நிற்பதாகத் தெரிவித்திருக்கின்றன. அப்பாவி பொதுமக்கள் மீது பயங்கரவாதிகள் நடத்திய தாக்குதல் அனைத்துத் தரப்பினராலும் வன்மையாகக் கண்டிக்கப்பட்டிருக்கிறது.

காஷ்மீர் பள்ளத்தாக்கில் உள்ள பிரிவினைவாதத்தை ஆதரிக்கும் கட்சிகளேகூட பஹல்காமில் நிகழ்ந்திருக்கும் சுற்றுலாப்பயணிகள் மீதான தாக்குதலைக் கண்டித்திருப்பதுடன் உயிரிழந்தவர்களுக்காக துக்கம் அனுசரிக்க அறைகூவல் விடுத்திருக்கின்றன. ஹுரியத் மாநாட்டின் தலைவர் மீர்வைஸ் உமர் பரூக், 'இதுபோன்ற வன்முறைகள் காஷ்மீரிய கலாசாரத்துக்கு எதிரானவை' என்றும், விருந்தினர்களை அன்புடன் உபசரிக்கும் பண்பை மீறிய செயல் என்றும் கண்டித்திருக்கிறார்.