பரப்புவோம்... திருக்குறளை உலகெங்கும்!

எந்த ஒரு மதம், இனம், மொழி சாராத ஒன்று திருக்குறள் என்ற பெருமிதம் நமக்கிருக்கிறது. அதை நாம் உலகப் பொது மறை என அழைக்கிறோம்.

- இரா.கதிரவன்

எந்த ஒரு மதம், இனம், மொழி சாராத ஒன்று திருக்குறள் என்ற பெருமிதம் நமக்கிருக்கிறது. அதை நாம் உலகப் பொது மறை என அழைக்கிறோம். பைபிள் மற்றும் குர்ஆன் ஆகிய நூல்களுக்கு அடுத்தபடியாக உலகில் அதிகப்படியான மொழிகளில் மொழிபெயர்க்கப்பட்ட நூல் திருக்குறள் என்று மகிழ்கிறோம். என்றாலும், இது குறித்த தரவுகள் மற்றும் ஆவணங்கள் பற்றிய எண்ணமில்லாமல், உணர்வின் அடிப்படையில் இவ்வாறு நாம் கருதுகிறோம்.

இந்திய பிரதமர், தாம் பயணிக்கும் நாடுகள் அனைத்திலும் திருக்குறளின் பெருமையைக் கூறி அதை அந்நாட்டவரிடம் அறிமுகப்படுத்துகிறார்; இது ஒரு அளப்பரிய பணியாகும்.

திருக்குறள் உலக மொழிகள் அனைத்திலும், எல்லா மக்களுக்கும் கொண்டு செல்லப்பட வேண்டும்; அதன் மூலம் உலகம் அறவழியில் அமைதியாக இன்புற்று இருக்க வேண்டும் என்ற பெரும் விருப்பம் தமிழ் மக்களுக்கு உண்டு.

இதுவரையிலும் செய்யப்பட்ட திருக்குறள் மொழிபெயர்ப்புகள் தமிழிலிருந்து அல்லது ஆங்கிலம் வழியாக பிற மொழிகளில், ஆர்வலர்களின் தன்முனைப்பு காரணமாகச் செய்யப்பட்டுள்ளன. தற்போது அரசு நிறுவனங்கள் மேற்கொள்ளும் திருக்குறள் மொழிபெயர்ப்பு முயற்சிகள் மகிழ்ச்சி அளிக்கின்றன.

திருக்குறள் எத்தனை மொழிகளில் இதுவரை மொழி பெயர்க்கப்பட்டுள்ளது? இதை அறிய, ஒரு அரசாங்கமோ பல்கலைக்கழகமோ ஈடுபட வேண்டிய இம் முயற்சியில் நல் மனமும் தன்முனைப்பும் கொண்ட ஒரு சில தமிழ் ஆர்வலர்கள் இது குறித்த உண்மை நிலையை அறிய அரும்பாடுபட்டு தரவுகளைச் சேகரித்தனர். பல்வேறு நாடுகளில் உள்ள தமிழ் ஆர்வலர்கள், அமைப்புகள், சங்கங்கள் ஆகியவற்றுடன் தொடர்பு கொண்டு சேகரித்தனர்.