நீங்களும் விண்வெளி வீரர்களாகி நிலவில் நடைபோடலாம்

மாணவர்களுக்கு சுபான்ஷு சுக்லா ஊக்கம்

- 

புது தில்லி, ஜூலை 8: வடகிழக்கு மாநிலங்களைச் சேர்ந்த பள்ளி மாணவர்களுடன் சர்வதேச விண்வெளி நிலையத்தில் இருந்து கலந்துரையாடிய விண்வெளி வீரர் சுபான்ஷு சுக்லா, 'உங்களில் பலர் எதிர்கால விண்வெளி வீரர்கள் ஆகலாம்; நிலவில் கூட நடை போடலாம்' என்று கூறி மாணவர்களை ஊக்கப்படுத்தினார்.

மேகாலயத்தின் ஷில்லாங் நகரில் உள்ள வடகிழக்கு விண்வெளி மையத்தில் (என்இஎஸ்ஏசி) செவ்வாய்க்கிழமை ஏற்பாடு செய்யப்பட்டிருந்த சிறப்பு நிகழ்ச்சியில் அஸ்ஸாம், மேகாலயம் ஆகிய மாநிலங்களைச் சேர்ந்த 7 பள்ளிகளின் மாணவர்களுடன் சுபான்ஷு சுக்லா 'ஹாம்' வானொலி மூலம் சுமார் 10 நிமிஷங்கள் உரையாடினார்.

சர்வதேச விண்வெளி நிலையத்தில் 12 நாள்களை நிறைவு செய்துள்ள சுபான்ஷு சுக்லா, விண்வெளி வீரருக்கான பயிற்சி பெற்றது மற்றும் விண்வெளியில் ஆரோக்கியமாக இருப்பது தொடர்பான தனது விண்வெளி நிலைய அனுபவங்கள் குறித்து மாணவர்களுடன் பகிர்ந்து கொண்டார்.