‘நீட்’ குளறுபடி: என்டிஏ-க்கு எதிரான வழக்கை உச்சநீதிமன்றம் முடித்துவைப்பு

இளநிலை மருத்துவப் படிப்புகள் சேர்க்கைக்கான நீட் (தேசிய தகுதிகாண் நுழைவுத் தேர்வு) குளறுபடிகளைத் தொடர்ந்து தேசிய தேர்வுகள் முகமை (என்டிஏ) செயல்பாடுகளுக்கு எதிராக தொடரப்பட்ட வழக்கை உச்ச நீதிமன்றம் முடித்துவைத்து திங்கள்கிழமை உத்தரவிட்டது.

- 

புது தில்லி, ஏப்.7: இளநிலை மருத்துவப் படிப்புகள் சேர்க்கைக்கான நீட் (தேசிய தகுதிகாண் நுழைவுத் தேர்வு) குளறுபடிகளைத் தொடர்ந்து தேசிய தேர்வுகள் முகமை (என்டிஏ) செயல்பாடுகளுக்கு எதிராக தொடரப்பட்ட வழக்கை உச்ச நீதிமன்றம் முடித்துவைத்து திங்கள்கிழமை உத்தரவிட்டது.

‘இந்த விவகாரம் தொடர்பாக அமைக்கப்பட்ட நிபுணர் குழு அளித்த பரிந்துரைகளில், இணைய வழியில் தேர்வு நடத்துவது என்ற பரிந்துரையைத் தவிர, மற்ற அனைத்து பரிந்துரைகளும் முழுமையாக நடைமுறைப்படுத்தப்படும்’ என்று மத்திய அரசு தரப்பில் உத்தரவாதம் அளிக்கப்பட்டதைத் தொடர்ந்து, வழக்கை முடித்துவைத்து உச்சநீதிமன்றம் உத்தரவிட்டது.

2024-ஆம் ஆண்டு மே மாதம் 5-ஆம் தேதி நடத்தப்பட்ட இளநிலை ‘நீட்’ தேர்வின்போது, பிகாரின் பாட்னா, ஜார்க்கண்ட் ஹசாரிபாக் தேர்வு மையங்களில் வினாத்தாள் கசிந்த விவகாரம் மிகப் பெரிய சர்ச்சையானது. இதைத் தொடர்ந்து, கடந்த ஜூன் மாதம் நடந்த கல்லூரி உதவிப் பேராசிரியர் பணிக்கான தேசிய தகுதித் தேர்விலும் (நெட்) முறைகேடு நடந்திருப்பதாகக் கூறி, பல லட்சம் பேர் எழுதிய அந்தத் தேர்வை மத்திய அரசு ரத்து செய்தது.