செஞ்சிக் கோட்டைக்கு யுனெஸ்கோ அங்கீகாரம்: பிரதமர் பெருமிதம்

யுனெஸ்கோவின் பாரம்பரிய நினைவுச் சின்னங்கள் பட்டியலில் தமிழகத்தின் விழுப்புரம் மாவட்டத்தில் உள்ள செஞ்சிக் கோட்டை உள்பட 12 மராத்திய கோட்டைகள் இடம்பெற்றிருப்பது, ஒவ்வொரு இந்தியருக்கும் பெருமை என்று பிரதமர் நரேந்திர மோடி தெரிவித்துள்ளார்.

- 

து தில்லி, ஜூலை 2:

உலக அளவில் தலைசிறந்த புராதனச் சின்னங்களை அடையாளம் கண்டு, அவற்றின் பாதுகாப்பை உறுதி செய்யும் நோக்கில், யுனெஸ்கோ பாரம்பரிய நினைவுச் சின்னங்கள் பதிவேடு பராமரிக்கப்படுகிறது. இந்தியாவில் வரலாற்று சிறப்புமிக்க 43 இடங்கள், இப்பட்டியலில் ஏற்கெனவே இடம்பெற்றுள்ளன.

இந்நிலையில், பிரான்ஸ் தலைநகர் பாரீஸில் நடைபெற்றுவரும் உலக பாரம்பரியக் குழுவின் 47-ஆவது அமர்வில், இந்தியாவில் மராத்திய பேரரசின் ராணுவ தளங்களுக்கு யுனெஸ்கோ அங்கீகாரம் வழங்கப்பட்டுள்ளது. அதன்படி, பட்டியலில் 44-ஆவது பாரம்பரிய நினைவுச் சின்னமாக ‘மராத்திய ராணுவ தளங்கள்’ (12 கோட்டைகள்) இடம்பெற்றுள்ளன. இதில் 11 கோட்டைகள் மகாராஷ்டிரத்திலும், ஒரு கோட்டை தமிழகத்தின் செஞ்சியிலும் அமைந்துள்ளன.

மகாராஷ்டிரத்தில் கடலோரப் பகுதி முதல் மலைப் பகுதி வரை பல்வேறு நிலப்பரப்புகளில் இக்கோட்டைகள் அமைந்துள்ளன.

கி.பி. 17 முதல் 19-ஆம் நூற்றாண்டு வரையிலான மராத்திய ஆட்சியாளர்களின் ராணுவ உத்தி மற்றும் கட்டடக் கலை நுட்பத்துக்கு சான்றாக விளங்கும் இக் கோட்டைகள், புவியியல் மற்றும் வியூக ரீதியிலான பாதுகாப்புத் திட்டமிடலை பிரதிபலிக்கின்றன.