திருப்பரங்குன்றம் சுப்பிரமணிய சுவாமி கோயிலில் நாளை குடமுழுக்கு

திருப்பரங்குன்றம் சுப்பிரமணிய சுவாமி கோயில் குடமுழுக்கு திங்கள்கிழமை (ஜூலை 14) நடைபெறுகிறது.

- 

திருப்பரங்குன்றம், ஜூலை 12: இதை யொட்டி, நகரெங்கும் அலங்கார மின் விளக்குகள், சுவாமி பாடல்களால் திருவிழா கோலம் பூண்டது.

திருப்பரங்குன்றம் சுப்பிரமணிய சுவாமி கோயிலில் குடமுழுக்கு விழாவுக்கான பாலாலயம் கடந்த பிப்.10-ஆம் தேதி நடைபெற்று திருப்பணிகள் தொடங்கின. இதில் முதல் கட்டமாக சுப்பிரமணிய சுவாமி கோயிலின் துணைக் கோயில்களான பழனியாண்டவர், சொக்கநாதர், குருநாதன் கோயில், பாம்பலம்மன் கோயில்களில் திருப்பணிகள் செய்யப்பட்டு குடமுழுக்குகள் நடைபெற்றன.

இதைத் தொடர்ந்து, இரண்டாம் கட்டமாக கோயிலின் துணைக் கோயில்களான சரவணப் பொய்கையில் உள்ள ஆறுமுக சுவாமி கோயில், படிக்கட்டு விநாயகர், மலைக்கு பின்புறம் உள்ள பால்சுனை கண்ட சிவபெருமான், சப்த கன்னிமார்கள் கோயில், மலை மேல் அமைந்துள்ள காசி விசுவநாதர் கோயில் ஆகிய கோயில்களில் குடமுழுக்குகள் நடைபெற்றன. தொடர்ந்து, சுப்பிரமணிய சுவாமி கோயிலின் ராஜகோபுரம், சிறிய விமானங்கள் உள்ளிட்ட பகுதிகள், கோயிலின் உள்பகுதி, மேல் நிலைகளில் வண்ணம் பூசுதல் உள்ளிட்ட திருப்பணிகள் நடைபெற்றன.