நாகை: 'உங்களுடன் ஸ்டாலின்' திட்ட முகாம் நாளை தொடக்கம்

நாகை மாவட்டத்தில் 'உங்களுடன் ஸ்டாலின்' திட்ட முதற்கட்ட முகாம்கள் ஜூலை 15 முதல் ஆகஸ்ட் 14 ஆம் தேதி வரை நடைபெறும் என ஆட்சியர் ப. ஆகாஷ் தெரிவித்துள்ளார்.

- 

நாகப்பட்டினம், ஜூலை 13:

இதுகுறித்து அவர் வெளியிட்ட செய்திக் குறிப்பு: நகர்ப்புற மற்றும் கிராமப் பகுதி மக்களின் குறைகளை தீர்க்கும் வகையில் 'உங்களுடன் ஸ்டாலின்' திட்டத்தின் கீழ் நாகை மாவட்டத்தில் வரும் ஜூலை 15 ஆம் தேதி முதல் தொடங்கப்பட்டு 3 மாதங்கள் தொடர்ந்து நடைபெறவுள்ளது. இத்திட்டத்தின் கீழ் நாகை மாவட்டத்தில் நகர்ப்புற பகுதிகளில் 31 முகாம்களும், கிராமப்புற பகுதிகளில் 66 முகாம்களும் கூடுதலாக 97 முகாம்கள் நடத்தப்பட உள்ளன.

முதற்கட்டமாக ஜூலை 15-ஆம் தேதி தொடங்கி, ஆகஸ்ட் 14-ஆம் தேதி வரையில் நாகை மாவட்டத்தில் உள்ள நகராட்சி பகுதிகளில் 10 முகாம்களும், பேரூராட்சி பகுதிகளில் 4 முகாம்களும், ஊரகப் பகுதிகளில் 22 முகாம்களும் என மொத்தம் 36 முகாம்கள் நடத்தப்பட உள்ளன.

ஜூலை 15 ஆம் தேதி: நாகை நகராட்சி வார்டு எண் 1,7,8 ஆகிய பகுதிகளுக்கு சிவன் தெற்கு வீதி நாகூர் எஸ்.டி.எஸ். திருமண மண்டபம் மற்றும் வேளாங்கண்ணி பேரூராட்சிக்குட்பட்ட வார்டு 1 முதல் 8 வரையிலான பகுதிகளுக்கு சிவன் கீழ வீதி வேளாங்கண்ணி ஆர்.எஸ். திருமண மண்டபத்தில் நடைபெறவுள்ளது.