விளைச்சல் இருந்தும் வீழ்ச்சி ஏன்?

இந்தியாவின் ‘தேசியக் கனி’ என்றும் ‘பழங்களின் ராஜா’ என்றும் மாம்பழம் போற்றப்படுகிறது. உலகின் மிகப் பெரிய மாம்பழ உற்பத்தியாளராக இந்தியா திகழ்கிறது. இந்திய மாம்பழ வகைகள் அதன் தனித்துவமான நறுமணம், சுவைக்காக உலகளாவிய அளவில் கவனம் பெற்றுள்ளன.

- இரா.சுந்தரபாண்டியன்

உற்பத்தியுடன் ஒப்பிடும்போது ஏற்றுமதி மிகவும் குறைவாக உள்ளது. இந்தியாவில் ஆண்டொன்றுக்கு சுமார் 2.4 கோடி மெட்ரிக்டன் மாம்பழங்கள் விளைகின்றன என்றால், சுமார் 32,000 மெட்ரிக் டன்கள்தான் ஏற்றுமதியாகின்றன. மெக்ஸிகோ, நெதர்லாந்து, பிரேசிலுக்கு அடுத்தபடியாக மாம்பழ ஏற்றுமதியில் இந்தியா நான்காம் இடம் வகிக்கிறது. 2024-இல் இந்தியாவின் மாம்பழ ஏற்றுமதி 16 கோடி டாலர். இது உலகளாவிய மாம்பழ ஏற்றுமதியில் 9.6% ஆகும்.

உலகின் செல்வச்செழிப்பு மிகுந்த நாடுகளான அமெரிக்கா, பிரிட்டன், ஐக்கிய அரபு அமீரகம், குவைத், கனடா, சிங்கப்பூர், ஓமன், கத்தார், சவூதி அரேபியா, நியூஸிலாந்து ஆகியவை இந்திய மாம்பழங்களை இறக்குமதி செய்வதில் முன்னிலை வகிக்கின்றன. அல்போன்ஸா, கேசர், பங்கனப்பள்ளி வகைகளுக்கு மத்திய கிழக்கு, ஐரோப்பா, ஆசிய நாடுகளில் வரவேற்பு அதிகமாக உள்ளது.

அமெரிக்காவுக்கான இந்திய மாம்பழ ஏற்றுமதி அதிவேக வளர்ச்சியை எட்டியுள்ளது. 2024-இல் மட்டும் ஏற்றுமதி மதிப்பு ஒரு கோடி டாலர். முந்தைய ஆண்டின் ஏற்றுமதி மதிப்பான 42.6 லட்சம் டாலரை ஒப்பிடும்போது இது 130% அதிகமாகும்.