தெலங்கானா-சத்தீஸ்கர் எல்லையில் இறுதிக்கட்ட நக்ஸல் 'வேட்டை'

24,000 வீரர்களுடன் தீவிரம்

- 

புதுதில்லி/ராய்பூர், மே 6:தெலங்கானா-சத்தீஸ்கர் எல்லையில் அடர் வனங்கள் நிறைந்த கர்ரேகுட்டா மலைத்தொடரில் நக்ஸல்களுக்கு எதிரான இறுதிக்கட்ட தாக்குதலை பாதுகாப்புப்படையினர் தொடங்கியுள்ளனர். 24,000-க்கும் மேற்பட்ட வீரர்களுடன் முன்னெப்போதும் இல்லாத அளவில் இந்த மாபெரும் நடவடிக்கை மேற்கொள்ளப்பட்டுள்ளது.

நாட்டில் இருந்து அடுத்த ஆண்டு மார்ச் மாதத்துக்குள் நக்ஸல் தீவிரவாதத்தை முற்றாக ஒழிக்க மத்திய அரசு இலக்கு நிர்ணயித்துள்ள நிலையில், நக்ஸல்களுக்கு எதிரான வேட்டை தீவிரப்படுத்தப்பட்டுள்ளது.

தெலங்கானா-சத்தீஸ்கர் எல்லையில் உள்ள கர்ரேகுட்டா மலைத்தொடரில் ஹித்மா, தேவா உள்ளிட்ட நக்ஸல் தலைவர்கள் பலர் பதுங்கியுள்ளதாக கிடைக்கப்பெற்ற தகவலைத் தொடர்ந்து, மத்திய ரிசர்வ் போலீஸ் படை (சிஆர்பிஎஃப்) தலைமையில் சத்தீஸ்கர் காவல் துறையின் மாவட்ட ரிசர்வ் படை, பஸ்தர் படை உள்பட பல்வேறு படைப் பிரிவினருடன் மாபெரும் நடவடிக்கை கடந்த ஏப்ரல் 21-ஆம் தேதி தொடங்கப்பட்டது.