பல்லடம் அருகே கழிவு நீர் சுத்திகரிப்பு நிலையம் அமைக்க எதிர்ப்பு

பல்லடம் அருகே கழிவுநீர் சுத்திகரிப்பு நிலையம் அமைக்க எதிர்ப்புத் தெரிவித்து அப்பகுதி பொதுமக்கள் மாவட்ட ஆட்சியரிடம் மனு அளித்தனர்.

- 

திருப்பூர், மார்ச் 17:

திருப்பூர் மாவட்ட ஆட்சியர் அலுவலகத்தில் வாராந்திர மக்கள் குறைகேட்புக் கூட்டம் திங்கள்கிழமை நடைபெற்றது. இக்கூட்டத்துக்கு மாவட்ட ஆட்சியர் தா.கிறிஸ்துராஜ் தலைமை வகித்தார்.

இதில், பல்லடம் வட்டம் ப.வடுகபாளையம்புதூர் கிராம பொது மக்கள் அளித்துள்ள மனுவில் கூறியிருப்பதாவது: பல்லடம் வட்டம், ப.வடுகபாளையம்புதூர் கிராமத்தில் பூமிதான வாரியத்துக்குச் சொந்தமான இடத்தில் பல்லடம் நகராட்சி சார்பில் கழிவு நீர் சுத்திகரிப்பு நிலையம் அமைக்க கடந்த ஒருவாரத்துக்கு முன்பு மண் பரிசோதனை செய்யப்பட்டது. அப்போது கிராம மக்கள் எதிர்ப்புத் தெரிவித்ததால் பணியைப் பாதியிலேயே நிறுத்திவிட்டு அதிகாரிகள் சென்றனர்.

எங்களது கிராமத்தில் ஏற்கெனவே குடிநீர் பிரச்னை உள்ளது. ஊரின் மையப் பகுதியில் கழிவு நீர் சுத்திகரிப்பு நிலையம் அமைத்தால் சுகாதாரம் பாதிக்கப்படுவதுடன், குடிநீர் ஆதாரமும் பாதிக்கப்படும்.