ஜிஎஸ்டி சீர்திருத்தத்தால் ஒவ்வொரு குடும்பமும் பலனடையும்

மத்திய நிதியமைச்சர் நிர்மலா சீதாராமன் உறுதி

- 

புது தில்லி, செப். 6: நாட்டில் செப்டம்பர் 22-ஆம் தேதி முதல் அமலாகும் சரக்கு- சேவை வரி (ஜிஎஸ்டி) சீர்திருத்தத்தால் ஒவ்வொரு குடும்பமும் பலனடையும்; நுகர்வு பெருகி, பொருளாதாரம் வலுப்படும் என்று மத்திய நிதியமைச்சர் நிர்மலா சீதாராமன் உறுதிபட தெரிவித்தார்.

இது திருப்புமுனையான ‘மக்களின் சீர்திருத்தம்’ என்று வர்ணித்த அவர், ஜிஎஸ்டி வரி விகிதக் குறைப்பின் பலன் மக்களுக்கு முழுமையாகக் கிடைப்பதை தனிப்பட்ட முறையில் கண்காணிப்பேன் என்றார்.

நாட்டில் 5%, 12%, 18%, 28% ஆகிய நான்கு விகிதங்களில் ஜிஎஸ்டி வசூலிக்கப்பட்டு வந்த நிலையில், அவை 5% மற்றும் 18% என இரு விகிதங்களாக குறைக்கப்பட்டுள்ளன.

உடல் நலனுக்கு கேடு விளைவிக்கும் பொருள்கள் மற்றும் ஆடம்பர பொருள்களுக்கு புதிதாக 40 சதவீத வரி அறிமுகப்படுத்தப்பட்டுள்ளது.