சீனாவில் பிரதமர் மோடி: ஜின்பிங்குடன் இன்று பேச்சு

7 ஆண்டுகளுக்குப் பிறகு சென்றார்

- 

தியான்ஜின், ஆக. 30: ஷாங்காய் ஒத்துழைப்பு அமைப்பின் (எஸ் சிஓ) உச்சிமாநாட்டில் பங்கேற்பதற்காக பிரதமர் நரேந்திர மோடி சீனாவின் தியான்ஜின் நகருக்குச் சனிக்கிழமை மாலை வந்தடைந்தார்.

கடந்த 2018-ஆம் ஆண்டுக்குப் பிறகு சீனாவுக்கு முதன்முறையாக வருகை தந்த பிரதமர் மோடிக்கு விமான நிலையத்திலும், அவர் தங்கியிருக்கும் விடுதியிலும் இந்திய பாரம்பரிய இசை மற்றும் நடனக் கலைஞர்கள் குழுவினரால் உற்சாக வரவேற்பு அளிக்கப்பட்டது.

இந்தியா மீதான அமெரிக்காவின் வரி விதிப்பால் இருதரப்பு உறவில் சலசலப்பு நிலவும் சூழலில், பிரதமரின் சீனப் பயணம் முக்கியத்துவம் வாய்ந்ததாகக் கருதப்படுகிறது.

ஜப்பான் பயணத்தைத் தொடர்ந்து சீனா வந்திறங்கிய பிறகு பிரதமர் மோடி வெளியிட்ட எக்ஸ் பதிவில், 'சீனாவின் தியான்ஜினில் தரையிறங்கினேன். எஸ்சிஓ உச்சி மாநாட்டில் நடைபெறும் விவாதங்களையும், பல்வேறு உலகத் தலைவர்களை சந்திப்பதையும் ஆவலுடன் எதிர்பார்க்கிறேன்' என்று குறிப்பிட்டார்.