வளர்ந்த பாரதத்துக்கு மகளிர் பங்களிப்பு முக்கியம்

குடியரசுத் தலைவர் உரை

- 

வளர்ந்த பாரதத்துக்கு மகளிர் பங்களிப்பு மிகவும் முக்கியமானது என குடியரசுத் தலைவர் திரௌபதி முர்மு தெரிவித்தார்.

நாட்டின் 77-ஆவது குடியரசு தினம் திங்கள்கிழமை (ஜன. 26) கொண்டாடப்படுவதை முன்னிட்டு நாட்டு மக்களுக்கு அவர் ஞாயிற்றுக்கிழமை உரையாற்றினார். அப்போது ஆபரேஷன் சிந்தூர், பெண்களுக்கு அதிகாரமளித்தல், பொருளாதார வளர்ச்சி உள்பட நாட்டின் பல்வேறு சாதனைகளை அவர் குறிப்பிட்டார்.

அவர் தனது உரையில் கூறியதாவது: 1947-ஆம் ஆண்டு ஆகஸ்ட் 15-ஆம் தேதி நாம் சுதந்திரம் பெற்ற பிறகு நமது கனவுகளை நனவாக்கும் உரிமைகளைப் பெற்றோம். அதைத் தொடர்ந்து, 1950, ஜன. 26-ஆம் தேதி நமது அரசமைப்புச் சட்டம் அமலானது. அன்றுமுதல் ஜனநாயகத்தின் பிறப்பிடமான பாரத நாடு, ஆதிக்கவர்க்கத்தில் இருந்து விடுபட்டு ஜனநாயக குடியரசாக உருவெடுத்தது. நீதி, சுதந்திரம், சமத்துவம் மற்றும் சகோதரத்துவம் ஆகிய சிந்தனைகள் நமது குடியரசின் தன்மையை விளக்குகிறது.

உலக அமைதிக்காக வழிபடுவது நமது பாரம்பரியம். அந்த வகையில், உலகின் பல்வேறு கண்டங்களில் பதற்றமான புவிஅரசியல் சூழல் நிலவிவரும் நிலையில், மனிதகுலத்தின் எதிர்காலத்தைப் பாதுகாக்க அமைதியின் தூதராக இந்தியா செயல்பட்டு வருகிறது.

கடந்த ஆண்டு இந்தியா மேற்கொண்ட 'ஆபரேஷன் சிந்தூர்’ நடவடிக்கை மூலம் பயங்கரவாத உள்கட்டமைப்புகள் தகர்க்கப்பட்டன. பயங்கரவாத மையங்கள் அழிக்கப்பட்டு பயங்கரவாதிகள் பலர் கொல்லப்பட்டனர். பாதுகாப்புத் துறையில் தற்சார்புக் கொள்கையைப் பின்பற்றியதே ஆபரேஷன் சிந்தூரின் வரலாற்று வெற்றிக்கு காரணம்.